sábado, 10 de octubre de 2026
Con respecto a este último campo, durante o acto de inauguración, o secretario xeral de Cultura, Anxo M. Lorenzo, destacou a importancia de pór en valor a Reimundo Patiño como un dos pais desta disciplina en galego cun estilo e unha linguaxe artística moi persoal, expresionista, informalista e surrealista, ademais de sinalar que se trata dunha das figuras da pos-guerra mais importantes para a nosa cultura, impulsor do colectivo Estampa Popular Galega e coautor do primeiro álbum de cómic na nosa lingua.
Na inauguración tamén estiveron os comisarios da mostra, Daniel Buján e Noelia Báscuas, xefa do Servizo da Biblioteca de Galicia. Ademais, interviu Laura Romero, presidenta da Asociación Galega de Profesionais da Ilustración (AGPI), entidade que colabora coa exposición, e tamén asistiu a diretora-xerente da Fundación Cidade da Cultura, Ana Isabel Vázquez.
Percorrido pola exposición
Nas vitrinas instaladas no vestíbulo da Biblioteca de Galicia atópanse exemplares como o de 2 viaxes, o primeiro álbum de cómic editado en galego, lanzado por Reimundo Patiño xunto co Xaquín Marín. Grazas ao Museo Carlos Maside tamén se expoñen as reproducións dixitais dalgunhas das 12 serigrafías que compoñen o cómic mural O home que falaba vegliota, considerada a obra fundacional da banda deseñada galega.
A mostra complétase con catálogos das súas exposicions, ilustracións e monografias en revistas, así como distintos textos como prólogos ou artigos que o autor realizou como teórico (revistas Vieiros e Grial ou xornal La Noche). Entre este material destacan os seus limiares na revista Cuadernos da Gadaña. Entre outras pezas, tamén se pode contemplar unha edición de Bandeiras Neboentas, un libro póstumo de poemas, publicado en 1992, que reflicte a súa faceta menos coñecida.
Ademais, participan nesta iniciativa catro artistas (Alberto Díaz, Aarón Moucho, Sandra Lodi e Andrea López) que realizaron especialmente para esta homenaxe cadansúa ilustración na que amosan a súa visión persoal do artista.
Forte actividade cultural e sociopolítica desde Madrid
Reimundo Patiño, nado na Coruña en 1936 e finado en 1985 pouco antes de cumprir os 50 anos, mantivo unha intensa actividade a nivel de ideais políticos e en prol da cultura galega desde que se instalou en Madrid en 1958. Así, a finais dos 60 impulsou a creación do colectivo Estampa Popular Galega, que produciu obra gráfica cunha forte compoñente sociopolítica.
Xa nos anos 70 erixiuse en cofundador do Taller Redor, a primeira galería de arte experimental española. Foi alí onde estampou e expuxo o cómic mural O home que falaba vegliota (1972) que une nunha mesma manifestación artística gravado e cómic. En 1975 publicaría, xunto con Xaquín Marín, o mencionado primeiro álbum de banda deseñada en galego, 2 viaxes, editado no seu selo Brais Pinto Gráfica.
Patiño colaborou como ilustrador en obras de autores importantes da época como Novoneyra, Méndez Ferrín ou Manuel María. É de destacar, ademais, que nos 80 foi convidado a participar en exposicións do grupo Atlántica, foco da renovación da plástica galega.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
