domingo, 8 de noviembre de 2026
Desde o ano 2009 (no que se rexistrou un 25,8) o abandono educativo temperá en Galicia reduciuse en 17,7 puntos, ao abeiro dos programas de mellora impulsados desde o Goberno galego en prol do esforzo e o éxito escolar.
Neste sentido, a Xunta de Galicia leva anos impulsando diferentes iniciativas, como os contratos-programa ou o Plan Recupera, para reforzar as competencias do alumnado que máis o precisa e impulsar a mellora da calidade educativa. A finalidade última é que ninguén quede atrás e que cada alumno acade o seu máximo no sistema, previndo o abandono educativo temperán, que se define como a porcentaxe de poboación entre 18 e 24 anos que non completou o nivel de educación secundaria segunda etapa e non segue ningún tipo de formación (regrada ou non regrada).
Así mesmo, a evolución na implantación de programas como EduLingüe ou a Estratexia Galega para a Educación Dixital, que avanzan no coñecemento das linguas estranxeiras e nas competencias dixitais, científicas e matemáticas, todas elas fundamentais no actual mundo globalizado, contribúen a incrementar o interese do alumnado pola educación e a fomentar a súa permanencia no sistema.
Por outra banda, o feito de que Galicia sexa a primeira comunidade con máis alumnado con necesidades educativas especiais integrado en centros ordinarios supón tamén unha significativa vantaxe. A inclusión educativa é a base do éxito escolar, dado que supón atender a cada estudante en función das súas capacidades, fomentando o seu talento e disuadíndoo de abandonar.
Un éxito de toda a comunidade
O Goberno galego quere poñer en valor o traballo de toda a comunidade educativa neste camiño cara ao éxito, moi especialmente dos equipos directivos e dos docentes, sen cuxa implicación sería imposible a implantación dos diferentes programas de innovación e de reforzo que se impulsan desde a Consellería de Cultura, Educación e Universidade.
A implicación das familias e o traballo do alumnado é, así mesmo, a base do fito acadado hoxe. Un dato que pon de relevancia que a cultura do esforzo é a que funciona para acadar novas metas e para consolidar resultados educativos que colocan a Galicia como referente de calidade educativa. Un liderado que tamén confirman outras entidades, como a Organización para a Cooperación e o Desenvolvemento Económicos (OCDE), a través do seu informe PISA.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
