jueves, 18 de junio de 2026
O titular da Xunta aproveitou tamén a xuntanza para trasladar a necesidade dun acordo global para desenvolver a industria eólica mariña e terrestre na Comunidade. Creo que é imprescindible facelo porque España e Galicia precisan máis enerxía verde, dixo, incidindo na importancia de que o Goberno central se incorpore ao Observatorio de eólica mariña a nivel galego que integra á industria, ao sector pesqueiro e á Administración autonómica, para estudar de forma conxunta como desenvolver esta enerxía, tendo en conta todos os intereses.
Sería bo buscar a complicidade de ambas administracións, porque as dúas queremos facer parques cumprindo a lexislación ambiental, asegurando os dereitos das persoas no territorio e incrementando a capacidade enerxética de España, abundou, recordando que, no tocante á eólica terrestre, Galicia conta cun plan sectorial que indica onde se poden desenvolver os parques.
Así mesmo, o titular da Xunta expresou novamente a preocupación polo impacto que o encarecemento da enerxía ten na industria electrointensiva e hiperelectrointensiva en Galicia e, a tal efecto, avanzou a decisión da Xunta de introducir un artigo na Lei de áreas empresariais para que as empresas que constrúan parques eólicos na comunidade e destinen o 50% da enerxía que produzan á industria a través de contratos de prezo fixo da enerxía (PPA) teñan prioridade na tramitación.
Nesta mesma liña, Feijóo fixo fincapé no enorme risco industrial que supón para o país o apagado das cubas de Alcoa. Non podemos quedar sen a única planta de aluminio primario de España, sentenciou, ademais de recalcar a urxencia de activar as cubas sen esperar a 2024 e na disposición do Executivo galego para a firma de PPAs.
E non podemos quedarnos tampouco sen industria pasteira, engadiu, referíndose a Ence e á posibilidade de adscribir a factoría aos terreos da Autoridade Portuaria de Marín.
Por último, e sobre as axudas a proxectos localizados dentro das zonas de transición xusta -5 na zona de Cerceda e 14 na das Pontes-, o presidente da Xunta instou ao Goberno a permitir que as comunidades participen no deseño das iniciativas, co obxectivo de garantir a maior eficiencia no emprego dos fondos públicos.
A Mostra Internacional de Teatro de Ribadavia reunirá do 17 ao 25 de xullo 25 espectáculos procedentes de Galicia, Portugal, Francia, México e diferentes comunidades autónomas, nunha 42ª edición atravesada pola creación contemporánea, a diversidade de linguaxes e formatos, a memoria histórica, a música en directo e a capacidade da escena para activar pensamento crítico e experiencia colectiva. Entre estas propostas figura A Fortaleza, da compañía A Feroz, coproducida polo Centro Dramático Galego e o festival FITEI do Porto. A obra, dirixida pola portuguesa Raquel Sousa e con dramaturxia de Lorena Conde e da propia Sousa, recupera a memoria das guerrilleiras antifranquistas galegas a través da figura de Consuelo Rodríguez López, Chelo.
O Festival de Música Antiga e Barroca Ateneo Barroco celebrará do 6 ao 20 de outubro a súa oitava edición cun programa articulado arredor da música antiga, os instrumentos históricos, a divulgación e o encontro co público. O certame compostelá ofrecerá seis concertos en diferentes espazos da capital de Galicia, ademais de cinema documental, unha conferencia, unha acción de improvisación, un club de lectura e varios encontros cos artistas. A programación principal de Ateneo Barroco desenvolverase en espazos como a Igrexa da Universidade, o Teatro Principal, o Salón Teatro e o Paraninfo da Universidade. O calendario de recitais abrirase con Lina Tur Bonet e Bach, partita, sonata, e continuará con Ars Atlántica, Resonet, Arc & Volta e Bertrand Cuiller, antes do peche con Accademia del Piacere e Fahmi Alqhai en In dulci jubilo.
