sábado, 14 de noviembre de 2026
Santiago de Compostela, 31 de decembro de 2021
Boas tardes a todos.
Chegadas estas datas, é tempo de botar a vista atrás e facer balance dun ano que unha vez máis volveu estar condicionado pola covid e que lamentablemente volve a condicionar este Nadal, que non está a ser como a todos nos gustaría.
Por iso, antes de nada, quero mandar unha aperta a todas esas familias que perderon un ser querido por mor da pandemia e a todos os que se atopan nos hospitais loitando por superar a enfermidade.
E tamén quero dar as grazas a eses profesionais, coma Yolanda Moares, que tanto nos coidaron e que volveron dar o mellor para salvar vidas e para curarnos. E que o seguen facendo.
Un grazas de corazón e de parte de todos os galegos a médicos, enfermeiros, auxiliares, a todos os sanitarios pero tamén a aqueles que co seu traballo fan que a vida sexa un pouco menos dura cada día: policías, xente de protección civil, traballadores de residencias, mestres...
Co seu esforzo, e o de todos os galegos, logramos que a taxa de mortalidade sexa a máis baixa da Península e conseguimos reducir o impacto da pandemia grazas ao sentidiño.
Estamos a ser un exemplo de responsabilidade e solidariedade na vacinación, cunhas das taxas máis altas de España e de Europa.
Nieves, Nieves foi a primeira dun proceso que está a ser modélico. Millóns de galegos pasaron polos recintos de vacinación ao longo deste ano e aínda o fan agora para recibir a dose de reforzo e para vacinarse por primeira vez os nenos. Un proceso nunca visto e que mereceu a Medalla de Ouro de Galicia para os profesionais que o puxeron en marcha.
Sen dúbida, as vacinas son fundamentais para ver a luz ao final do túnel, afrontar con maior seguridade as novas variantes e ondas e tentar sobrepoñernos dunha vez a esta pandemia. O camiño non é sinxelo, pero os galegos somos quen de superar os obstáculos e chegar a bo porto.
Demostrárono este ano os deportistas galegos, que se superaron a si mesmos e volveron de Toquio con 11 medallas. Pero a verdade é que este ano foron moitos os galegos que mereceron o ouro. Os hostaleiros. Os profesores. Os empresarios. Os nosos maiores. Os nenos. Agricultores e gandeiros. Xentes do mar. E todos aqueles que con esforzo, humildade e sacrificio, non se renderon e que contribúen a facer cada día unha Galicia mellor.
Porque os galegos somos un exemplo de resiliencia antes de que se inventase esa palabra. Somos quen de dar o mellor de nós mesmos e seguir camiñando. Así o fixemos hai 40 anos, cando tamén con obstáculos e dificultades, aprobamos o Estatuto de Autonomía e emprendemos o camiño de maior progreso da nosa historia recente.
Catro décadas de avances nos que Galicia ten demostrado dende unha esquina da península que ser leal non é incompatible con ser reivindicativo. Que é posible sumar e servir aos cidadáns de Galicia e de España ao tempo que se mantén a identidade e as raíces. E todo iso é posible grazas aos galegos.
Sen dúbida, o Xacobeo marcará o vindeiro ano, como tamén o fará a evolución da pandemia e como afrontar a recuperación económica.
Seguro que aínda quedan dificultades. Estamos de cheo nelas. A incertidume de novas ondas, a suba do coste da vida, o prezo da luz... van ser pedras no camiño.
Pero Galicia conta cos instrumentos para facer fronte ao virus e por suposto está preparada para aproveitar os fondos europeos e poñer en marcha unha serie de proxectos que contribúan a dinamizar a nosa economía, xerar emprego e avanzar nun novo modelo máis verde, máis innovador e máis xusto.
Estamos preparados porque fixemos os deberes e porque temos o mellor recurso: a nosa xente.
Galicia non é só a fin do camiño, é tamén orixe e o camiño en si mesmo. O Camiño de Santiago é un modelo de concordia e está na orixe da construción europea.
Neste 2022 temos un novo Ano Xacobeo, de forma extraordinaria, e imos aproveitar todo o seu potencial. Todos estades convidados a participar dun acontecemento extraordinario, a gran festa de Galicia onde todos sodes benvidos.
Estou seguro de que en 2022, Galicia seguirá avanzando e os protagonistas non van ser outros que vós, as galegas e os galegos. Vós sodes imprescindibles para camiñar cara unha Galicia mellor.
Feliz Ano 2022 a todos.
Saúdos do Gabinete de Comunicación da Xunta de Galicia
O 68,7 % da poboación galega de 16 a 74 anos dispón de competencias dixitais básicas ou avanzadas, fronte ao 61,4 % de 2025, o que supón un incremento relativo do 11,9 %. O 42,6 % da poboación galega de 16 a 74 anos ten competencias dixitais avanzadas, cinco puntos porcentuais máis ca en 2025, e o 26,1 % ten competencias básicas. Son datos publicados hoxe polo INE no informe sobre equipamento e uso das TIC nos fogares, analizados polo Observatorio da Sociedade da Información da Axencia para a Modernización Tecnolóxica de Galicia (Amtega).
Foi presentada na Cidade da Cultura a iniciativa 'Circo no Camiño', que celebrará entre o 12 de novembro e o 6 de decembro a súa primeira edición, na que contará con artistas nacionais e internacionais. A proposta Circo no Camiño quere achegar as artes escénicas a diferentes localidades galegas relacionadas co Camiño de Santiago. Para isto avanza unha programación variada de espectáculos de circo, maxia, música, acrobacias, humor e animación de rúa dirixidos a todos os públicos, que se desenvolverán tanto nunha gran carpa como nas rúas.En concreto, a programación desenvolverase en catro localidades galegas: Verín, Lalín, A Estrada e Santiago de Compostela, onde se pechará a programación, entre os días 3 e o 6 de decembro.
