martes, 29 de septiembre de 2026
O director xeral de Relacións Exteriores e coa UE, Jesús Gamallo, representou hoxe a Galicia na XIII Reunión da Comisión Hispano-Lusa para a Cooperación Transfronteiriza preparatoria do vindeiro Cumio bilateral entre España e Portugal que se celebrará a finais de outubro deste ano.
Na reunión participaron os representantes das Comunidades Autónomas de Galicia, Castela e León, Estremadura e Andalucía, e os representantes das Comisión de Coordinación e Desarrollo Rexional do Norte (CCDR-N), Centro, Alentejo e Algarve. A reunión foi copresidida polo director xeral dos Asuntos Europeos do Ministerio de Negócios Estrangeiros de Portugal e pola secretaria xeral técnica do Ministerio de Asuntos Exteriores, Unión Europea e Cooperación de España.
A Xunta destacou as prioridades reflectidas no documento consensuado coa de Portugal que se enviaron aos gobernos español e portugués para ser tidas en conta no próximo Cumio Ibérico Hispano-Luso. As propostas amosan as necesidades reais e actuais na Eurorrexión.
Na reunión debatéronse, entre outros puntos, o desenvolvemento da Estratexia Común para o Desenvolvemento Transfronteirizo, e a importancia de seguir apoiando un crecemento sostible, intelixente e integrador de acordo coas prioridades contidas nos Plans de Recuperación e Resiliencia, a axenda europea en política de cohesión ou o Pacto Verde Europeo. Tamén se destacou o papel decisivo da financiación do Programa POCTEP para o desenvolvemento da raia luso-española e analizáronse os elementos do novo período de financiamento 2021-2027.
O director xeral rematou a súa intervención insistindo na necesidade dunha discriminación territorial positiva ao territorio de fronteira da Eurorrexión, recoñecendo a súa elevada permeabilidade social, a súa dinámica económica específica e a identidade cultural compartida, profundamente afectadas no contexto das medidas de confinamento na xestión da crise da pandemia.
Retos de futuro
A Xunta demandou a ambos Estados que se intensifiquen os esforzos ante a Comisión Europea para fixar a dotación financeira nos futuros programas, así como para que se identifiquen as áreas territoriais que serán beneficiarias, defendendo manter o territorio elixible dos períodos anteriores, que contribuirá á consolidación da Eurorrexión Galicia-Norte de Portugal. Incidiu na necesidade de intensificar a cooperación transfronteiriza en materia de infraestruturas, como a conexión ferroviaria de alta velocidade, a aposta conxunta da Eurorrexión pola promoción turística do Camiño portugués, o fomento de proxectos de desevolvemento económico conxuntos, e unha maior articulación dos servizos colectivos de proximidade nas rexións de fronteira, no ámbito científico e da actualización da RIS3 Transfronteriza, da transición enerxética e ecolóxica, apoiando, por exemplo, o desenvolvemento do hidróxeno verde como vector enerxético de futuro.
Entre as demandas da Eurorrexión, a Xunta tamén destacou a importancia de manter a cooperación na xestión da Reserva da Biosfera Transfronteiriza Gerês-Xurês, no ámbito da economía azul, a mellor articulación entre os modelos de desenvolvemento, certificación e xestión forestal, así como na vertente da prevención e protección civil. Por último, reclamouse a promoción e divulgación das manifestacións culturais e creativas e a abordaxe conxunta dos impactos do cambio demográfico.
O Cumio Ibérico entre os Gobernos de España e Portugal celebrarase en Trujillo no mes de outubro.
A Xunta iniciou hoxe nas residencias de maiores a campaña de vacinación fronte á gripe, que incorpora a vacina reforzada desde os 65 anos e busca chegar a 926.000 persoas de máis de 60 anos. En Galicia hai 926.000 persoas de 60 ou máis anos como poboación diana para a vacinación fronte á gripe, e ao redor de 549.000 maiores de 70 anos, que é a poboación diana para a que está indicada a inmunización fronte á covid. A campaña prolongarase ata o 31 de decembro, desenvolvéndose de xeito progresivo nos distintos colectivos e grupos de idade. Así, logo do arranque de hoxe nas residencias de maiores e centros de discapacidade, o vindeiro día 13 de outubro incorporarase a vacinación infantil nos centros de saúde e nos 75 colexios.
O informe de balance do programa de axudas para a Atracción de Empresas a Galicia, unha liña xestionada pola Consellería de Economía e Industria a través do Igape que se consolida como un piar estable dentro da estratexia económica do Goberno galego, reflicte que entre os anos 2024 e 2026, este programa permitiu a concesión de 74,08 millóns de euros en subvencións públicas, unha contía que impulsou a posta en marcha de 96 proxectos empresariais e que xerará un impacto económico total de 256,75 millóns de euros en mobilización de investimento privado.
