sábado, 19 de julio de 2025
Partindo da base de que a pandemia provocou en España en 2020 un impacto económico sen precedentes e sen equivalentes na OCDE, o informe destaca que Galicia está entre as catro comunidades autónomas menos afectadas e a medio camiño entre España e a media da UE27, indicouse na rolda de prensa. Neste senso, David Regades explicou que o informe conclúe que foi determinante o comportamento das exportacións e do sector da automoción e Santiago Lago que a esa dinámica contribuíu unha menor incidencia do virus e unha desescalada máis rápida tras o confinamento. Ademais, no informe sublíñase que os ERTE teñen sido un mecanismo exitoso para afrontar a pandemia; que a fenda de xénero no mercado de traballo amplíase e as mulleres levan a peor parte e que a automoción tivo un comportamento extraordinariamente positivo en Galicia xa desde xuño de 2020.
Os resultados da enquisa de Ardán entre as empresas arroxan datos como que o 37% optou por aplicar un ERE; o 55% recorreu ás liñas de liquidez do ICO ou Igape e o 58% ao teletraballo. O 28% das compañías enquisadas declara un efecto severo provocado pola pandemia, o 60% un impacto moderado e un 12% unha incidencia desprezable. En hostalaría e actividades artísticas, recreativas e de entretemento as porcentaxes superan o 90%. No extremo contrario, indican desde Zona Franca, aparecen as empresas do sector primario (10%), información e comunicacións (17%) e actividades profesionais, científicas e técnicas (26%). O crecemento das vendas on line en 2020, engaden, é moi notable (+9%), especialmente nas máis grandes (+29%).
En canto aos posibles escenarios para 2021, o informe apunta que, no escenario optimista, o crecemento anual agardado é 8,8% e no escenario pesimista a taxa de crecemento simulada é 4,8%. Finalmente, o documento anota neste senso sete oportunidades e retos: dixitalización, demografía, medio rural, automoción, sistema de I+D+i, transición enerxética, redución de burocracia e impulso de colaboración público-privada.
Situación empresarial en 2019
Ademais do capítulo sobre o impacto da pandemia, o informe Ardán 2021 analiza unha mostra de 35.529 empresas (que supoñen o 51% do PIB de Galicia), que depositaron as súas contas anuais do exercicio 2019 nos rexistros mercantís das provincias galegas. Dos datos obtidos destácase que o conxunto de empresas rexistrou uns ingresos de explotación de 108.058 millóns de euros e achegaron ao PIB, a través do valor engadido bruto, 32.878 millóns de euros. Esta cifra recolle unha marca histórica para os datos de Galicia, sinalan desde Zona Franca. No conxunto das empresas, a capacidade para crear valor engadido bruto creceu no ano analizado a un ritmo do 4,8%. O informe tamén recolle que as empresas de Galicia teñen unha capacidade de creación de riqueza un 130% maior sobre a que se produciu no ano 2009, o peor ano da crise. O número de postos de traballo directos asignados a estas empresas é de 406.274 persoas, un 3,4% máis que o ano anterior.
Analizando o tecido empresarial de Galicia por sistemas produtivos sectoriais, o informe indica que o téxtil, confección e moda representa o 38,29% do valor engadido bruto. Séguelle servizos profesionais, que volve ser o número dous cun 14,44%, e construción xera o 8,66% sobre o conxunto de Galicia. En cuarta posición está loxística e transporte cun 5,53% e automoción e equipo cun 5%. Estes cinco sistemas produtivos xunto con agroalimentario e pesca son os responsables do 80% do valor engadido bruto creado polo tecido empresarial de Galicia no ano analizado, indican os responsables do informe. No período analizado rexistrouse unha creación neta de postos de traballo do 2,9%.
Un total de 1.621 empresas alcanzan un ou máis indicadores Ardán: alto rendemento, alta produtividade, gacela, ben xestionada, xeradora de riqueza, empresa global, empresa circular, empresa igual en xénero, empresa innovadora e xestión do talento. O total de firmas con indicadores son só un 5% da mostra. Entre as novidades de Ardán está que nesta edición deseñouse unha nova metodoloxía para medir a capacidade das empresas para xestionar o talento, que presentou o profesor Xavier Martínez Cobas. Por último, no que respecta ao índice de igualdade, o ano 2021 achega un lixeiro retroceso. No informe calcúlase o custo de non igualdade para as mulleres, resultado de comparar a situación real cunha hipotética situación de igualdade, e o cálculo teórico da perda neta para as mulleres no ano 2020 foi do 4,8%, é dicir, as mulleres deixan de percibir, de media, 17.315 euros brutos anuais por non atoparse nunha situación de equilibrio.
O 112 Galicia rexistra os seus picos de emerxencia durante as tardes e noites de verán. Os meses estivais traen consigo un cambio nos hábitos da poboación galega: días máis longos, noites máis activas e un aumento significativo das incidencias xestionadas polo 112. Segundo os datos, as franxas horarias con maior demanda son as 15:00 e as 20:00 horas, coincidindo cun estilo de vida máis intenso e prolongado durante o verán. En 2023, o servizo rexistrou medias de 1.300 intervencións entre as 15:00 e as 16:00 horas, e case 1.500 (1.484) entre as 19:00 e as 20:00 horas durante xuño, xullo e agosto. Aínda que en 2024 houbo un descenso global de incidencias (233.289 anuais), estas franxas mantiveron cifras elevadas: máis de 1.000 chamadas á tarde e 1.200 á noite no mesmo período.
O Goberno galego incrementará o orzamento destinado á formación do persoal dos servizos de prevención de incendios forestais ata os 1,8 millóns de euros no bienio 2025-2026, o que supón un 19% máis que no período anterior. Esta medida enmárcase no Plan de Prevención e Defensa contra os Incendios Forestais de Galicia (Pladiga), cuxo obxectivo é minimizar o impacto ecolóxico, económico e social dos lumes, optimizando os recursos dispoñibles. O compromiso formativo da Consellería do Medio Rural xa se reflectiu en 2024, cando se impartiron 473 cursos con 11.447 participantes e máis de 108.000 horas de adestramento.
