viernes, 13 de noviembre de 2026
A conselleira do Mar, Rosa Quintana, participou hoxe na Conferencia Sectorial de Pesca na que se aprobaron os criterios de reparto do Fondo Europeo Marítimo de Pesca e Acuicultura (Fempa) para o período 2021-2027 entre os organismos intermedios de xestión da Administración Xeral do Estado e as comunidades autónomas. Nesa distribución a Galicia correspóndenlle preto da metade dos fondos repartidos entre as comunidades -excluída Canarias, que conta cun plan de compensación específico- con máis de 366 millóns de euros dos arredor de 735 millóns de euros outorgados aos Executivos autonómicos.
O Fempa aprobado polas institucións europeas para os vindeiros anos asigna a España un total de 1.120 millóns de euros -un 3,6% menos que os 1.161 millóns de euros do actual FEMP-, dos que a Administración Xeral do Estado se reserva algo máis de 233 millóns de euros. A contía aprobada para Galicia, pola súa banda, supón practicamente a estabilidade dos fondos -cun descenso do 1,3%- ao pasar dos 371 millóns de euros do fondo actual aos máis de 366 millóns aprobados para o período 2021-2027.
Á marxe da asignación dos recursos para as comunidades, a titular do Mar trasladou ao Ministerio de Agricultura, Pesca e Alimentación varias propostas para optimizar o uso do futuro fondo e apoiar de xeito homoxéneo a todas as frotas pesqueiras nacionais. Entre as consideracións trasladadas está a posibilidade de establecer paradas temporais en todas as comunidades, estendéndoas así ás que poderían ter que desenvolverse en augas do Cantábrico-Noroeste, fronte á proposta inicial que limita a súa aprobación a augas do Mediterráneo e o golfo de Cádiz.
Centros de investigación
Outra das propostas defendidas pola conselleira do Mar na Conferencia Sectorial de Pesca refírese á necesidade de que as distintas entidades de investigación existentes en Galicia poidan participar na asignación de fondos para a elaboración de informes sobre o estado dos caladoiros. Esta medida suporía ampliar a máis organismos investigadores a participación no Programa Nacional de Datos Básicos, no que inicialmente está incluído un centro de investigación vasco que conta cunha asignación de catro millóns de euros.
A titular de Mar trasladou a confianza do Executivo galego en que os fondos asignados a España e a Galicia no marco do futuro Fempa permitan impulsar o complexo mar-industria da comunidade e facilitar tanto o traballo dos profesionais do mar como o desenvolvemento das zonas costeiras.
O 68,7 % da poboación galega de 16 a 74 anos dispón de competencias dixitais básicas ou avanzadas, fronte ao 61,4 % de 2025, o que supón un incremento relativo do 11,9 %. O 42,6 % da poboación galega de 16 a 74 anos ten competencias dixitais avanzadas, cinco puntos porcentuais máis ca en 2025, e o 26,1 % ten competencias básicas. Son datos publicados hoxe polo INE no informe sobre equipamento e uso das TIC nos fogares, analizados polo Observatorio da Sociedade da Información da Axencia para a Modernización Tecnolóxica de Galicia (Amtega).
Foi presentada na Cidade da Cultura a iniciativa 'Circo no Camiño', que celebrará entre o 12 de novembro e o 6 de decembro a súa primeira edición, na que contará con artistas nacionais e internacionais. A proposta Circo no Camiño quere achegar as artes escénicas a diferentes localidades galegas relacionadas co Camiño de Santiago. Para isto avanza unha programación variada de espectáculos de circo, maxia, música, acrobacias, humor e animación de rúa dirixidos a todos os públicos, que se desenvolverán tanto nunha gran carpa como nas rúas.En concreto, a programación desenvolverase en catro localidades galegas: Verín, Lalín, A Estrada e Santiago de Compostela, onde se pechará a programación, entre os días 3 e o 6 de decembro.
