Deste xeito, na provincia da Coruña haberá probas na Coruña, Culleredo, Fene, Ferrol, Narón, Oleiros e Santiago de Compostela; na de Lugo, en Monforte, Lugo e Viveiro; na de Ourense, no Carballiño, Ourense, Ribadavia e Vilamarín; e na de Pontevedra, na Estrada, Cangas, Lalín, Ponteareas, Pontevedra, O Porriño, Valga, Vilagarcía de Arousa e Vigo.
As 132 sedes son na súa totalidade centros educativos, tanto colexios e institutos como escolas oficiais de idiomas, centros integrados de FP, conservatorios de música e danza, escolas de arte e superiores de deseño e mesmo algunha escola universitaria.
As localidades con máis exames van ser as cidades. Así, a da Coruña acollerá probas de 27 especialidades, Vigo de 18, Santiago de 17, Pontevedra de 14, Lugo de 13 e Ourense de 12. Pola súa parte, en Culleredo e Ferrol haberá exames de cinco especialidades; en Monforte, Ribadavia, Lalín, O Porriño e Vilagarcía de dúas especialidades e no resto de localidades dunha soa especialidade.
Así mesmo, A Coruña contará con 24 sedes, Vigo con 22, Santiago con 15, Pontevedra e Ourense con 14 e Lugo con 12. En Ferrol haberá sete sedes, en Culleredo catro, en Ponteareas tres e dúas en Narón, Lalín e Vilagarcía. O resto de localidades terán unha sede.
As persoas opositoras poden consultar no Portal Educativo a que tribunal está adscrito e o centro concreto no que actúa cada tribunal
Incremento de tribunais
O incremento de sedes, localidades e tribunais incremento de localidades é a principal medida da Xunta de Galicia para acadar as máximas garantías de seguridade sanitaria nas oposicións. No referido a estes últimos, serán un total de 368, o que supón máis que duplicar os 163 tribunais que houbo nas oposicións do ensino do ano 2019.
Tendo en conta que hai 25.710 persoas inscritas nestas probas, o número medio de opositores de tribunal será de 70, fronte aos 109 opositores por tribunal do ano 2019.
Protocolo propio
As devanditas medidas van acompañadas dun completo protocolo de adaptación á covid que inclúe entre os seus puntos fundamentais que aos recintos só poderán acceder as persoas opositoras, gardar unha distancia de 1,5 metros, o uso obrigatoria de máscara cirúrxica ou hixiénica, a hixiene de mans con xel hidroalcohólico á entrada e saída, a limpeza e a desinfección das superficies, a ventilación dos espazos e o uso exclusivamente persoal de materiais como os bolígrafos, entre outros.
Así mesmo suprímese o acto de presentación e será cada tribunal o que comunique a través do Portal Educativo a aula concreta na que se examinará cada persoa e todas as cuestión que sexan necesarias; e a identificación das persoas opositoras realizarase na propia mesa, cando xa estean sentadas, para evitar aglomeracións. O persoal opositor deberá consultar no Portal Educativo a información e recomendacións que poida realizar o tribunal ao que está adscrito.
A Consellería de Cultura, Educación e Universidade adquiriu para o desenvolvemento destas probas, a través dunha compra centralizada, 1.200 litros de hidroxel e 60.000 máscaras para diversas necesidades, así como 1.200 caixas de panos desinfectantes. Este material xa se está a repartir entre as diferentes sedes.