viernes, 30 de octubre de 2026
A este respecto, a directora da Axencia Galega de Innovación (Gain), destacou que Galicia xa ten un amplo traballo avanzado, coa incorporación de drons na atención de urxencias sanitarias, protección da frota pesqueira, vixilancia e prevención dos lumes, xestión do territorio ou control da calidade das augas, por exemplo. Un avance que camiña en paralelo á liña que segue nestes momentos a industria, sendo cada vez máis os sectores que os utilizan na súa vertente aérea, terrestre e naval para mellorar a eficiencia de servizos públicos como a inspección de infraestruturas; control de evolución nos cultivos agrícolas; traballos audiovisuais e cartografía; ou servizos de emerxencias.
Unvex 2021 supón, tal e como sinalou a directora de Gain, un gran escaparate para os avances que se van producindo na industria galega, poñendo como exemplo a iniciativa pioneira en Europa do Polo Aeroespacial de Galicia, que xa ten garantida a súa continuidade coa Estratexia 2021-2025. De feito, xa están comprometidos por parte da Xunta preto de 70M e que, de obter fondos europeos, podería chegar a mobilizar 540M de investimento público-privado.
Con esta nova folla de ruta, Galicia márcase importantes obxectivos como atraer entre catro e seis empresas tractoras, desenvolver 20 novas solucións tecnolóxicas ou a creación de 24 empresas. Así, Argerey asegurou que a industria aeroespacial supón na actualidade un dos sectores estratéxicos na nova era dixital, polo que puxo en valor a colaboración entre administracións e, sobre todo, a implicación das empresas e centros de coñecemento.
Na actualidade, son 50 axentes os que toman parte no Polo Aeroespacial, entre os que se atopan tres socios tecnolóxicos da Xunta que actúan como empresas tractoras como son Indra, Babcock e Boeing; o tecido empresarial galego; e os centros tecnolóxicos e de investigación, así como as tres universidades galegas.
Coa convicción de que o Polo permitirá a Galicia consolidar a industria baseada na I+D+i, o proxecto enmarca tamén o parque tecnolóxico e industrial do aeródromo de Rozas e a aceleradora de empresas especializada no sector, a Business Factory Aero (BFAero), iniciativas que tamén contribúen a xerar novas oportunidades para captar e reter talento.
Os profesionais e empresas do sector que visiten Unvex, ademais de asistir ás conferencias programadas na Cidade da Cultura da man de profesionais e empresas punteiras, terán tamén a oportunidade de acudir a dúas demostracións de vehículos autónomos, marítimos e aéreos no Polo Aeroespacial de Galicia situado no aeródromo de Rozas (Castro de Rei) e na Escola Naval Militar de Marín.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
