sábado, 7 de noviembre de 2026
A Xunta de Galicia colabora un ano máis na organización do Festival Internacional de Música de Ourense Pórtico do Paraíso, promovido pola Asociación Pórtico Musical e que chega á súa 14ª edición unindo música e patrimonio. A cita, que este ano se suma ao calendario cultural no marco da celebración do Xacobeo 21-22, terá lugar do 4 ao 13 de xuño cunha carteleira de concertos e outras actividades en diferentes monumentos da Ribeira Sacra e de Ourense.
A presentación do evento tivo lugar hoxe nunha rolda de prensa no catamarán que percorre o Sil desde o peirao de Santo Estevo, no Concello ourensán de Nogueira de Ramuín. No acto participaron, en representación do Goberno galego, o delegado territorial da Xunta en Ourense, Gabriel Alén, e Jacobo Sutil, director da Axencia Galega das Industrias Culturais (Agadic).
Segundo se anunciou, nesta edición, o festival ofrece catro concertos nunha escolma de mosteiros da Ribeira Sacra, á que se suma para o recital inaugural a igrexa ourensá de Santiago de Caldas, e a proxección dun documental, que terá lugar no Teatro Principal da capital ourensá.
Así, o grupo italiano de música medieval Lareverdie abrirá o programa o día 4 de xuño na igrexa de Santiago de Caldas. O día 6, será o pianista catalán Daniel Ligorio quen ofreza un concerto no mosteiro de Santo Estevo de Ribas de Sil, en Nogueira de Ramuín. O venres 11, no Teatro Principal, proxectarase o documental aragonés Nebra. El triunfo de la música, e, o sábado 12, o festival volverá á Ribeira Sacra co conxunto de música barroca asturiano Forma Antiqva, que actuará no mosteiro de Santa María, en Xunqueira de Espadanedo. Finalmente, o peche porao o acordeonista vasco Iñaki Alberdi o domingo 13 no mosteiro de San Pedro de Rocas, en Esgos.
Experiencia única de escoita
A fórmula de unir a música con destacados espazos patrimoniais e paisaxísticos converte este festival nunha experiencia única de escoita consolidada na difusión de intérpretes galegos, nacionais e internacionais. A descentralización xeográfica é outro dos valores do evento, xa que permite combinar a carteleira musical con percorridos turísticos pola xeografía ourensá. Así o explicou na súa intervención, Jacobo Sutil, quen agradeceu o esforzo da Asociación Pórtico Musical pola organización deste evento nun contexto de dificultade pola situación sanitaria derivada da covid-19. O representante da consellería de Cultura, Educación e Universidade salientou, así mesmo, o compromiso co público de todos os colectivos culturais galegos que están a traballar arreo nesta mesma liña de recuperación e dinamización das nosas manifestacións culturais.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
