martes, 3 de noviembre de 2026
A Química é unha das ferramentas máis poderosas coas que conta a sociedade para afrontar os desafíos do século XXI. Cada día, o compromiso dos investigadores do Centro Singular de Investigación en Química Biolóxica e Materiais Moleculares (CiQUS) permite explorar novas aplicacións en campos como a saúde (Química Biolóxica e Médica), ou a industria (Materiais Funcionais, Catálise). En só oito anos o centro tense consolidado como referente de investigación interdisciplinaria na fronteira entre a Química, a Biomedicina e a Ciencia de Materiais, tal e como se poderá comprobar na cuarta edición de Ciencia Singular. Charlas en streaming, un tour virtual ou experimentos científicos pensados para os máis pequenos serán algunhas das actividades que nutrirán a xornada.
Medicina Molecular e Enfermidades Crónicas
O Centro Singular de Investigación en Medicina Molecular e Enfermidades Crónicas (CiMUS) traballa na prevención, comprensión e tratamento das enfermidades crónicas en áreas como Cancro, Endocrinoloxía, Cardiovascular, Neurociencias, Xenética e Bioinformática, Nanomedicina ou Desenvolvemento de Fármacos. O CiMUS tamén tomará parte nesta xornada en liña de divulgación científica con visitas virtuais, demostracións en laboratorios con microscopios de última xeración ou charlas divulgativas.
Tecnoloxías Intelixentes
O Centro Singular de Investigación en Tecnoloxías Intelixentes (CiTIUS) traballa no desenvolvemento dunha nova xeración de tecnoloxías intelixentes que integren a Intelixencia Artificial (IA) nos diferentes niveis existentes entre o mundo físico e o cognitivo. O obxectivo é tirar proveito das potencialidades da IA na resolución de problemas cada vez máis complexos e poñela ao servizo das persoas, garantindo a transparencia e a confiabilidade. Entre as súas múltiples aplicacións, tal e como se poderá comprobar en Ciencia Singular, figuran eidos como a saúde, a industria, o transporte ou as cidades intelixentes. Nesta primeira edición virtual, o CiTIUS propón un innovador formato de visita ao Centro a través dun evento en directo en Youtube conducido por un recoñecido divulgador científico.
Física de Partículas, Astropartículas e Nuclear
O Instituto Galego de Física de Altas Enerxías (IGFAE) é un centro acreditado como Unidade de Excelencia María de Maeztu. Dende a súa fundación, colabora en grandes infraestruturas internacionais como CERN. O IGFAE organizou para esta xornada un programa de relatorios virtuais que cobren as tres áreas estratéxicas nas que o instituto divide a súa investigación: o Modelo Estándar ata os límites, Partículas cósmicas e física fundamental e Física nuclear dende o laboratorio para mellorar a saúde das persoas. Os relatorios serán emitidos pola canle de Youtube do IGFAE, en cuxo chat o público poderá participar en directo coas súas preguntas.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
