domingo, 6 de julio de 2025
O director xeral de Políticas Culturais da Xunta de Galicia, Anxo M. Lorenzo, e o presidente da Real Academia Galega de Belas Artes (RAGBA), Manuel Quintana Martelo, inauguraron hoxe na sede da RAGBA a mostra Facer Camiño. Trátase dunha exposición na que 12 dos máis destacados artistas galegos asocian a arte co Camiño de Santiago e que chega a cidade herculina logo da súa estadía en Vigo, onde foi visitada por máis de 3.000 persoas en pouco máis dun mes.
Durante a inauguración da mostra, Anxo M. Lorenzo salientou a capacidade de Facer camiño para asociar a expresión plástica e visual de hoxe cun dos elementos esenciais na conformación da nosa identidade: o Camiño de Santiago e a importancia dos académicos que participan nesta peregrinación artística. Trátase dunha nómina extraordinaria de artistas de diferentes xeracións que abordan a arte desde diversos medios expresivos e estilos e que comparten dúas características: formar parte da Real Academia Galega de Belas Artes e ser creadores recoñecidos e fortemente valorados.
O representante da Consellería de Cultura e Turismo explicou que Coruña, sede da RAGBA, é a segunda e máis especial parada desta itinerancia que arrancou en Vigo e que nos próximos meses chegará tamén as cidades de Lugo, Ourense, Pontevedra, Santiago de Compostela e Ferrol, así como as vilas de Tui, Cee e Mondoñedo asociadas ao territorio histórico das Rutas Xacobeas.
Escolma do talento galego
Así, ata o vindeiro 13 de setembro, poderase visitar na sede da institución académica a mostra comisariada por Asunta Rodríguez e que reúne unha escolma do traballo dos artistas galegos, todos eles pertencentes á RAGBA: Manuel Buciños, Ignacio Basallo, Xosé Díaz, Menchu Lamas, Xurxo Lobato, Acisclo Manzano, Din Matamoro, Manolo Paz, Soledad Penalta, Manuel Quintana Martelo, Rafael Úbeda e Miguel Anxo Prado.
Concretamente expóñense 23 pezas, entre as que se inclúen pinturas, esculturas e fotografías, enfiadas por citas e referencias á peregrinación xacobea e á súa meta de autores tan destacados como Dante, Federico García Lorca ou Vicente Risco.
Descentralización do Xacobeo 2021
A mostra inaugurada este serán enmárcase no marco de colaboración institucional existente entre a Administración autonómica e a Academia, referendado mediante a sinatura dun convenio de colaboración o pasado mes de xuño. Unha colaboración na que a Xunta de Galicia inviste preto de 100.000 euros e que durante este ano se centra. de xeito monográfico. en afondar no vínculo entre a cultura e o Camiño de Santiago, a través dunha programación de calidade, accesible e deslocalizada.
Anxo M. Lorenzo destacou que no actual escenario de incerteza é importante lograr que o Xacobeo 2021 sexa máis descentralizado que nunca para que repercuta de xeito positivo en toda Galicia, tamén na cidade da Coruña e no conxunto de concellos do Camiño Inglés. A maiores da mostra, tamén está previsto organizar coa RAGBA un ciclo de conferencias e debates relacionados co patrimonio e a cultura da nosa terra, que complete e complemente a itinerancia prevista de Facer Camiño. No caso da Coruña, a cita terá lugar o martes 8, ás 20,00 horas, e estará protagonizada por José Ramón Soraluce e Felipe Senen.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
