lunes, 19 de mayo de 2025
O festival de danza Corpo(a)terra adiantou hoxe o programa da súa décima edición, que se desenvolverá en Ourense e en Allariz do 26 ao 30 de agosto e para a que conta cun dobre apoio por parte da Xunta de Galicia. Dunha banda, a través da achega de preto de 11.500 euros mediante a convocatoria anual de axudas da Consellería de Cultura e Turismo a festivais profesionais de artes escénicas, e doutra, coa estrea galega no marco do Xacobeo 2021 da produción Pedra nas luces, espectáculo de música e baile aéreo, protagonizado por 32 drons de luz.
O director da Axencia Galega das Industrias Culturais (Agadic), Jacobo Sutil, detallou esta dobre contribución durante a presentación do festival, que tivo lugar este mediodía no Centro Cultural Marcos Valcárcel de Ourense coa participación das representantes da compañía TrasPediante, organizadora do evento, e das principais entidades colaboradoras.
Sutil felicitou o equipo organizativo por este aniversario, así como polo seu esforzo para adaptar a edición deste ano á actual situación sanitaria, garantindo a seguridade de público, artistas e técnicos sen que se vexa afectada a calidade da programación, cunha destacada presenza das propostas galegas.
Neste sentido, lembrou que a Xunta está a desenvolver o Plan de reactivación dos sectores cultural e turístico cunha serie de medidas encamiñadas a apoiar as empresas e profesionais fronte aos efectos da covid-19. Entre elas, a modificación das bases das devanditas subvencións a festivais escénicos, a través das que se distribuíron 190.000 euros entre dez eventos de toda Galicia. O aumento das porcentaxes de contratación de compañías galegas, así como do orzamento máximo que os adxudicatarios poden financiar a través desta convocatoria, son algún dos principais cambios introducidos en 2020.
Este compromiso coa nosa cultura, e en particular coa nosa danza, reflíctese tamén noutras medidas do plan, como a flexibilización das axudas destinadas á creación e á distribución de espectáculos escénicos, así como a ampliación do circuíto Cultura no Camiño para chegar a preto de 150 concellos, explicou o responsable da Agadic, quen tamén adiantou que esta semana se publicará no Diario Oficial de Galicia unha nova convocatoria de apoio ao sector a través da que, no marco do Xacobeo 2021, se impulsarán proxectos de carácter plurianual como residencias, ciclos ou novas programacións.
En canto á carteleira deste décimo festival de danza e artes do corpo, subliñou varias propostas novidosas, como a estrea do espectáculo Pedras nas luces, que se desenvolverá na noite do día 28 en Allariz e na do día 29 en Ourense. Trátase dunha coprodución de Umiles e a Central Folque inspirada nos canteiros de Cotobade, na que os drons bailarán ao son da música, que poderá ser escoitada polos espectadores desde os seus dispositivos móbiles vía streaming a través da web do festival.
A programación tamén inclúe montaxes de compañías galegas como Kirenia Danza, Alejandra Balboa, Funboa ou Nuria Sotelo, ademais das obras seleccionadas polo circuíto Acieloabierto, performances DJ e colaboracións internacionais, como o Programa de Movemento Virtual Xeolocalizado, que lle permitirá ao público gozar desde os seus smartphones de tres pezas de danza audiovisual nas tres prazas ourensás nas que estarán xeolocalizadas.
Foi presentada a 16ª edición da (S8) Mostra de Cinema Periférico, que se celebrará do 3 ao 8 de xuño en diferentes espazos da Coruña, entre eles a Filmoteca de Galicia. Cun total de 112 obras en proxección e a participación de 60 cineastas procedentes de 15 países, a cita converterá a cidade no centro mundial do cinema experimental e de vangarda. Nesta edición, a programación inclúe máis títulos realizados por mulleres, máis cinema en directo, retrospectivas inéditas e unha homenaxe ao formato Súper 8, que neste 2025 cumpre 60 anos de historia. Unha das novidades desta vindeira edición da (S8) é a ampliación de Sinais, sección onde se reúne o mellor da creación cinematográfica contemporánea da península ibérica, con 21 películas galegas e españolas.
O ciclo de concertos Orballo Cultural vén de presentar a súa edición 2025, que se celebrará entre os meses de maio a setembro. Este ciclo propón levar ata distintas localidades da xeografía galega, concretamente aos concellos de Estrada, Tomiño, O Porriño, Ribadavia, Muxía, Noia, Ferrol e Sanxenxo, a artistas da escena musical galega. Entre os nomes xa confirmados están Xabier Díaz & Adufeiras de Salitre, Su Garrido Pombo, Herdeiros da Crus ou The Limboos. O ciclo Orballo Cultural busca unir a variada oferta musical de Galicia co patrimonio cultural e natural de distintas localidades, de tal modo que se pon en valor a rica variedade de opcións turísticas da comunidade. Ademais, integra a gastronomía e a artesanía como valores engadidos, nunha proposta que quere apostar pola sostibilidade e a igualdade.
