viernes, 6 de noviembre de 2026
No tocante á evolución na Mariña, onde se localizou un brote que levou a pechar esa comarca o pasado domingo, o responsable do Executivo galego destacou que, desde o punto de vista asistencial, os cadros das 121 persoas afectadas non revisten gravidade e a inmensa maioría -o 95%- están a ser atendidos nos seus domicilios. Tamén é moi importante que non hai incidencia nun dos puntos máis vulnerables nesta pandemia, dixo, en alusión ás residencias de maiores.
Diante destas cifras, Feijóo aseverou que a Administración autonómica seguirá vixiando a progresión do brote para actuar en consecuencia con dúas prioridades: protexer a saúde dos veciños e reducir as posibilidades de que este se estenda a outros lugares da provincia ou a comunidades veciñas.
Logo de agradecer a colaboración da Delegación do Goberno e dos alcaldes da comarca, aos que se está a informar diariamente, Feijóo confirmou que, nos vindeiros días, a Xunta continuará coa estratexia de realizar test masivos para localizar e illar os positivos, ademais de facer un seguimento especial aos contactos máis vulnerables.
Nesta liña, precisou que se os datos e a situación epidemiolóxica reflicten unha melloría notable, o Comité clínico e a Consellería de Sanidade valorarán a posibilidade de diminuír o confinamento dos concellos, abrindo unha fase de transición para volver paulatinamente á mesma situación que hai no resto de Galicia. O Plan de brote distingue tres zonas na comarca -a Mariña occidental, a Mariña oriental e a Mariña central- e o Comité clínico e a Consellería de Sanidade valorarán en función do número de PCR positivas se nos próximos días podemos diminuír o número de concellos confinados, dixo, subliñando que o 90% dos casos atópanse concentrados en 3 concellos.
Feijóo aproveitou a xuntanza para apelar novamente á responsabilidade individual de todos e cada un dos cidadáns, porque tranquilidade non pode significar relaxación. Todos temos que facernos as mesmas preguntas, todos os días e en todo momento: somos suficientemente precavidos no traballo?, somos coidadosos cando vemos á familia?; recordamos as medidas de prevención cando quedamos cos amigos?, dixo, incidindo na necesidade de ter presente sempre que cada apertura supón riscos.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
