viernes, 6 de noviembre de 2026
A directora da Axencia Galega de Innovación, Patricia Argerey, participou esta mañá, por vía telemática, no Infoday de presentación da primeira convocatoria de consolidación da aceleradora Business Factory Food (BFFood), especializada no sector alimentario. Na súa intervención animou aos asistentes -empresas tractoras do sector, startups candidatas a participar na segunda fase da aceleradora e representantes do Clúster Alimentario de Galicia (Clusaga)- a seguir apostando pola innovación, se cabe, con maior motivo no contexto da pandemia actual, que ten demostrado o carácter esencial do sector alimentario.
Argerey destacou a importancia da innovación como factor de competitividade para unha industria que presenta un bo compartamento e potencial de crecemento. De feito, as exportacións alimentarias de Galicia superaron os 275 millóns de euros en marzo. Nesta liña, subliñou a relevancia de instrumentos como as aceleradoras para impulsar o emprendemento e o crecemento daquelas empresas e proxectos con potencial innovador. De aí o apoio da Xunta de Galicia á rede de aceleradoras a través da plataforma StartIN Galicia, que aglutina todas as medidas da Consellería de Economía, Emprego e Industria de impulso ao emprendemento innovador.
A directora de Gain destacou que o obxectivo dos proxectos que participan na aceleradora é achegar solucións ás necesidades da industria e incrementar a eficiencia no uso dos recursos dispoñibles. E puxo de manifesto a implicación de todo o sector, a través do Clúster Alimentario de Galicia que xestiona e coordina o programa de aceleración, de importantes empresas tractoras e centros de coñecemento que colaboran na iniciativa.
Sobre a I convocatoria de consolidación da BFFood
Esta primeira convocatoria de consolidación da Business Factory Food está aberta ata o 8 de xuño e terá unha duración de 12 meses. Os proxectos que queiran presentarse, a través da páxina web www.bffood.gal, deben ser empresas xa constituídas, con menos de seis anos de antigüidade, cun produto ou servizo definido e primeiras vendas xa realizadas.
Con motivo da situación xerada pola crise sanitaria da covid-19, incorpórase un novo reto a esta convocatoria de consolidación enfocado a buscar proxectos que poidan ser aplicables ao sector alimentario e á súa cadea de valor e que supoñan unha innovación, en sentido amplo, dirixida a fortalecer a resiliencia da industria alimentaria de Galicia fronte a situacións de emerxencia derivadas de pandemias, como a provocada polo coronavirus. Este novo reto súmase aos sete xa existentes nesta primeira convocatoria de consolidación, que son: trazabilidade, calidade e seguridade alimentaria; loxística; sustentabilidade e packaging; desenvolvemento de novos produtos; innovación de procesos e comercialización; e reto aberto. Ata seis proxectos poderán ser seleccionados nesta convocatoria de consolidación na que recibirán formación, mentoring, servizos técnicos, infraestruturas e financiamento.
Este programa de consolidación de BFFood conta co apoio fundamental de grandes empresas do sector, como Adegas Martín Códax, Cafés Candelas, Calvo, Capsa Food (Larsa), Clavo Food Factory, Cooperativas Lácteas Unidas (Clun), Congalsa, Galacteum, Gadis, Kiwi Atlántico, Quescrem, Nueva Pescanova, Torre de Núñez e Viña Costeira, que se encargarán do proceso de mentorización dos proxectos que resulten seleccionados.
Entre as entidades colaboradoras están, ademais, as tres universidades galegas, a Asociación Galega de Cooperativas Agrarias (Agaca), Anfaco-Cecopesca, o Instituto Tecnolóxico de Galicia (ITG) e la Fundación Empresa-Universidade Galega (Feuga), que forman parte do comité técnico. Pola súa parte, Gradiant, Coremain, Cámara de Comercio de Santiago de Compostela, ASM, Cesga, Asociación Área Empresarial do Tambre e Sigillum Knowledge Solutions integran o comité asesor da aceleradora.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
