miércoles, 29 de abril de 2026
O director xeral de Emerxencias e Interior da Xunta de Galicia, Santiago Villanueva, presentou, xunto co xerente da Axencia Galega de Emerxencias, Marcos Araújo, o balance de actividade do 112 Galicia, que finalizou o 2019 con 230.000 incidencias xestionadas, o que supón unha media diaria de 630 intervencións dos servizos de emerxencias.
Un total de incidencias, segundo explicou Villanueva, lixeiramente superior ao ano anterior, cando se contabilizaron máis de 228.000 incidencias.
Con respecto á cantidade de chamadas atendidas, o responsable do departamento autonómico confirmou que continúa a tendencia á baixa dos últimos anos, o que ratifica o comportamento cada vez máis responsable da cidadanía en relación ao uso do número único de atención ás chamadas de emerxencia.
Así, en 2019, atendéronse 950.000 chamadas, o que supón un 1 por cento menos que en 2018 e un 13 por cento menos que en 2016, cando se superou o millón de comunicacións no 112 Galicia.
Esta baixada progresiva, afirmou Santiago Villanueva, ten bastante que ver co importante labor en materia de prevención e concienciación sobre a redución de riscos e o uso axeitado dos servizos de emerxencias que se está a realizar desde diferentes eidos, como son os simulacros colaboramos en 249- ou o traballo divulgativo desde a web e os perfís do 112 Galicia en Redes Sociais.
Neste senso, o director xeral destacou que o perfil do servizo está a piques de alcanzar os 10.000 seguidores en Facebook e supera os 8.500 en Twitter. A través destas canles, o servizo difundiu máis de 2.700 consellos de auto protección e informacións sobre fenómenos meteorolóxicos adversos e os sucesos máis importantes da xornada. Na web tamén se poden atopar contidos semellantes, de feito, rexistrou 1,5 millón de consultas en 2019.
Igualmente, valorou as visitas organizadas ao Centro Integrado de Atención ás Emerxencias (CIAE-112) e ao hangar do Grupo de Apoio Loxístico (GALI), pois preto de 600 persoas pasaron por estas instalacións en 2019 co fin de saber máis e coñecer mellor este servizo.
Por provincias e tipoloxías
Por outra banda, Villanueva recordou que seguen a ser as provincias atlánticas as que aglutinan o groso das incidencias xestionadas, concretamente contabilizáronse máis de 88.000 na Coruña e 84.000 en Pontevedra, mentres que en Ourense e Lugo sumaron 30.000 e 27.000, respectivamente.
En canto á tipoloxía das incidencias, o director xeral de Emerxencias e Interior comentou que de forma maioritaria as intervencións xestionadas desde o 112 Galicia estiveron relacionas coa prevención de riscos, extinción de incendios e salvamento, así como coas solicitudes de asistencia médica, seguida do requirimentos das forzas da orde e os accidentes de tráfico, labores e ferroviarios.
Para facer fronte a estas situacións, o persoal do 112 Galicia solicitou a intervención dos recursos de emerxencias en 445.000 ocasións. En 2019, foron os servizos sanitarios de urxencia e os axentes de Policía Local os grupos máis demandados, seguidos da Garda Civil de Tráfico, voluntarios de Protección Civil e bombeiros.
Máis de 20 avisos ao día por niños de velutinas
Nos grupos por tipoloxías tamén destacan os avisos por animais soltos, feridos, falecidos e a formación de enxames de avespas velutinas. Sobre isto, Villanueva concretou que, se ben esta cifra ten diminuído considerablemente con respecto ao ano 2018, case un 40 por cento, segue a ser esencial a colaboración cidadá para detectar os casos urxentes.
Neste sentido, o xerente da Axencia Galega de Emerxencias, Marcos Araújo, insistiu en que para informar da presenza de niños de velutinas os cidadáns teñen á súa disposición o teléfono de información da Xunta de Galicia 012, salvo en casos nos que a localización do niño supoña un risco para as persoas que poden utilizar o 112.
Araújo lembrou que os lugares de risco considéranse aqueles de pública concorrencia, como os centros de saúde, colexios, garderías, edificios administrativos... tamén espazos públicos, prazas, parques, etc.
Foron presentadas as xornadas Galicia Biodays, que buscan posicionar Galicia como un territorio de referencia en innovación biotecnolóxica no ámbito internacional. Este evento vaise celebrar os días 6 e 7 de maio no Auditorio Mar de Vigo, e permitirá reforzar a marca Galicia Calidade en biotecnoloxía, fomentar o intercambio de coñecemento e establecer novas colaboracións científicas, empresariais e institucionais. Está previsto que asistan máis de 1000 persoas de 9 biorrexións convidadas, con máis de 130 relatores.
Alfonso Rueda informou de que o Consello deu conta do inicio da tramitación do anteproxecto da que será 'a primeira Lei do terceiro sector da acción social de Galicia'. Unha norma que busca 'unificar nun único texto legal a regulación deste eido e recoñecer de xeito formal o seu traballo e o papel que xogan as entidades na sociedade galega'. A necesidade de aprobar esta lei xustifícase na importante presenza destas entidades en Galicia, preto de 1.500, -que constitúen 'unha auténtica rede de solidariedade', segundo resaltou a conselleira de Política Social e Igualdade, Fabiola García-, para apoiar as persoas e fogares máis vulnerables.
