miércoles, 12 de agosto de 2026
O presidente do Goberno galego, Alberto Núñez Feijóo, avanzou hoxe, na rolda de prensa de Consello, a autorización da sinatura dun convenio de colaboración entre a Xunta e as universidades de Santiago e de Vigo para o desenvolvemento do Inventario Forestal Continuo de Galicia que se actualizará ano a ano.
Logo de incidir en que o forestal é un sector estratéxico na nosa Comunidade con máis de 80.000 familias que viven del e co 60% das cortas de toda España, Feijóo explicou que o obxectivo desta inventario forestal é dobre. Por unha banda, permitirá facer un seguimento da cantidade e do estado das masas arboradas e, por outra, permitirá crear unha estratexia de apoio ás decisións en materia de política forestal mediante un sistema de monitoraxe continuado.
Así mesmo, entre as cuestións que xustifican a sinatura deste acordo, sinalou tanto a existencia dunha grande cantidade de superficies forestais de pequeno tamaño complexas de inventariar, como as masas mixtas ou a necesidade de contar con datos máis actualizados.
Finalmente, Feijóo concluíu explicando que contar cun inventario propio permitirá a Galicia beneficiarse da continua investigación para elaborar novas políticas sobre o monte e contar con datos únicos para empregar en análises científicas. E, ao mesmo tempo, aproveitou para destacar que o dito convenio dará cumprimento a unha das recomendacións do ditame da comisión especial non permanente de estudo e análise das reformas da política forestal.
Pola súa banda, o conselleiro destacou que a creación deste inventario é fundamental para poñer en marcha o Plan de recuperación de soutos tradicionais, o cal permitirá diferenciar con exactitude aqueles soutos tradicionais das novas plantacións de castiñeiros.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
