jueves, 13 de agosto de 2026
A Consellería de Economía, Emprego e Industria abre hoxe o prazo de matriculación na cuarta edición do programa formativo Medrando Xuntas, que se desenvolverá dos meses de marzo a xuño de 2020 e está destinada a promover o talento feminino na economía social.
A iniciativa conta con dous itinerarios diferenciados, un para directivas e outro para socias e traballadoras. O itinerario para directivas está enfocado a responsables de dirección e/ou de goberno para ofrecerlles unha formación co fin de potenciar as capacidades directivas con perspectiva de xénero como factor clave no seu desenvolvemento profesional. Os contidos que se traballarán son os de xestión das organizacións de economía social, habilidades directivas e proxectos colaborativos.
Ademais as alumnas contarán cun acompañamento personalizado durante toda a formación para axudalas a mellorar o seu desenvolvemento profesional. O curso ten unha duración de 60 horas de duración e desenvolverase entre o 6 de marzo e o 12 de xuño, na sede da Escola Galega de Administración Pública en Santiago de Compostela.
Por outra banda, o itinerario para socias e traballadoras quere ofrecer unha formación específica enfocada para empoderar as mulleres pertencentes ás organizacións de economía social en contornas urbanas e rurais. O curso ten unha duración de 20 horas e realizarase entre os meses de abril e maio, na Escola Galega de Administración Pública en Santiago de Compostela (ao igual que o de directivas). Os contidos versan sobre a xestión das organizacións de economía social e habilidades persoais.
Ademais terá lugar o III Foro Medrando Xuntas, o encontro anual das mulleres da economía social. É un espazo que permite a conversa sobre os retos, desafíos e oportunidades que as mulleres teñen na economía social de Galicia e que serve como punto de encontro para construír modelos de negocio de éxito a través dunha economía máis xusta.
Toda a información relativa a Medrando Xuntas pode consultarse na web da Rede Eusumo. As prazas para participar no programa formativo son limitadas e a preinscrición pode realizarse a través do formulario que se pode atopar na dita web ata o 25 de febreiro. Para consultas e información adicional está dispoñible o correo electrónico medrandoxuntas.emprego@xunta.gal.
Medrando Xuntas enmárcase tanto dentro do programa Emprega en feminino como na Estratexia Galega de Economía Social, unha folla de ruta que busca impulsar 30 medidas ata 2021 co obxectivo de xerar 3.000 empregos e crear 300 novas entidades.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
