sábado, 19 de septiembre de 2026
O titular de Cultura e Turismo da Xunta agradeceu a presenza en Galicia dos seus homólogos nas comunidades polas que transcorre a Vía da Prata e destacou que se trata dun dos máis importantes itinerarios xacobeos, ao tratarse dun Camiño que vertebra toda España de norte a sur. Precisamente, durante o acto de apertura do encontro, os responsables de Cultura destas catro autonomías coincidiron na necesidade de traballar conxuntamente na coordinación, posta en valor e difusión deste itinerario con acreditado valor histórico, artístico e cultural.
Os conselleiros participantes esperaron que este foro permita potenciar sinerxias para aproveitar a proxección do próximo Xacobeo 21 como oportunidade para dinamizar este roteiro e os núcleos de poboación que atravesa, a maior parte deles concellos do rural. Neste sentido, lembraron que este ano, a Vía da Prata foi percorrida xa por máis de 9.000 persoas, aínda que puntualizaron que dispón dun gran potencial de crecemento grazas á súa riqueza patrimonial e natural.
Valoracións dos conselleiros
A conselleira de Cultura e Patrimonio Histórico da Junta de Andalucía, Patricia del Pozo, destacou a importancia que o Camiño de Santiago tivo na historia de España en xeral pero de Andalucía en particular, estando vinculada a lugares emblemáticos como Itálica ou a propia Catedral de Sevilla. Del Pozo insistiu en que a cultura, no seu sentido máis amplo, é a mellor embaixadora de Andalucía e da súa forma e modo de entender a vida, polo que avogou polo maior dos acordos e do traballo coordinado e conxunto entre comunidades e administracións para apostar, de maneira transversal, pola cultura como dinamizadora turística e económica, aproveitando esta arteria que atravesa España que é o Camiño de Santiago.
Nesa liña, o conselleiro de Cultura e Turismo de Castela e León, Javier Ortega, subliñou que a cooperación entre estes territorios é imprescindible para conseguir un futuro mellor, traballando para que a cultura e o turismo se consoliden e afiancen como motores de desenvolvemento local e contribúan ao equilibrio territorial, como o fan os nosos roteiros históricos.
Pola súa banda, a conselleira de Cultura, Turismo e Deportes da Junta de Extremadura, Nuria Flores Redondo, declarou que espera que este encontro reforce a colaboración para a posta en valor da Vía da Prata como itinerario cultural e turístico dentro da Marca España, e impulse a inclusión das comunidades do sur de España (Estremadura e Andalucía) no Consello Xacobeo do Ministerio de Cultura e Deportes.
En representación de Galicia, Román Rodríguez destacou a aposta da Xunta no impulso da Vía da Prata, acometendo actuacións de mellora do trazado, de sinalización, iniciativas para avanzar na atención e acollida dos peregrinos, como a posta en marcha de novos albergues en Ourense, A Gudiña ou Oseira, así como outras actividades de dinamización e promoción cultural neste roteiro.
Programa de traballo
Durante a xornada de mañá os responsables de Cultura e Turismo participarán cos seus equipos en diferentes reunións de traballo para abordar, entre outros asuntos, a conservación do patrimonio cultural do Camiño, a súa importancia para o desenvolvemento económico das zonas rurais ou a sinalización e conservación dos itinerarios.
Acto seguido, terá lugar unha mesa redonda para abordar a incidencia da Ruta Xacobea no territorio. Nela, participarán o alcalde de Palas de Rei, Pablo Taboada, que explicará o impacto socioeconómico da Ruta Xacobea nun concello como o seu, situado no Camiño Francés; o presidente da Agrupación industrial de Turismo de Galicia, Cesáreo Pardal, que abordará a relevancia deste fenómeno achegando o punto de vista do sector; e o presidente da Asociación de Amigos do Camiño Portugués, Tino Lores, como representante dunha entidade que xestiona un albergue, neste caso o de Pontevedra, e que desenvolve un intenso labor a favor da peregrinación.
Medio milleiro de investigadoras e investigadores e máis de 150 actividades científicas nas sete cidades galegas: Vigo, Ourense, Pontevedra, Santiago, A Coruña, Ferrol e Lugo. Así se celebrará en Galicia a sexta edición da Noite Galega das Persoas Investigadoras, G-Night 2026, unha actividade na que a comunidade científica galega une talento e esforzos co obxectivo de achegar a ciencia á cidadanía e espertar vocacións científicas, ao tempo que se ofrecen propostas de lecer científico, cultural e educativo para toda a familia.
A Xunta de Galicia reclama ao Goberno central medidas estruturais de apoio ao sector agrogandeiro. Do mesmo xeito, esíxese que se teña en conta a realidade de cada territorio á hora de levar a cabo estas actuacións, que deben executarse de xeito urxente. Así o trasladou a conselleira do Medio Rural, María José Gómez, na Conferencia Sectorial celebrada en Madrid, na que se dirixiu ao ministro de Agricultura, Pesca e Alimentación, Luis Planas, para facer estas reclamacións. Alí, reafirmou tamén o compromiso do Executivo galego con este sector.
