viernes, 6 de noviembre de 2026
A Xunta de Galicia vén de formalizar a primeira emisión de débeda con rendibilidade negativa por importe de 25 millóns de euros. O Diario Oficial de Galicia (DOG) publicará mañá esta emisión de bonos a tres anos cunha rendibilidade do -0,05%, xunto con outra de 200 millóns a catro anos e cun tipo de xuro cero.
Ambas as dúas emisións está dirixidas por Abanca e permitirán amortizar anticipadamente o préstamo correspondente ao Fondo de Facilidade Financeira formalizado no ano 2015, e aforrar 4 millóns de euros en gastos financeiros.
O Fondo de Facilidade Financeira é un mecanismo creado pola Administración do Estado para as comunidades autónomas cumpridoras dos obxectivos de estabilidade, o límite de débeda, a regra de gasto e o límite de pago a provedores. Este préstamo tiña un tipo de xuro do 0,83% e un prazo de amortización que vencía no ano 2025.
Hai que lembrar que Galicia volveu aos mercados neste 2019, combinando grazas ao cumprimento das regras fiscais- esta saída gradual ao mercado co Fondo de Facilidade, o que lle permitiu aproveitar a abundante liquidez, os tipos historicamente baixos e a elevada demanda dos investidores.
A Comunidade galega conta coa cualificación de ráting máis alta entre as comunidades autónomas de réxime común e está ao mesmo nivel que España posto que o ráting dun Estado soberano non pode ser superado polo dunha comunidade de réxime común. Así, a axencia Standard&Poors cualifica o nivel de crédito de Galicia en A- (cualificación media-alta) e a axencia Moodys outórgalle o nivel Baa1.
Para o vindeiro ano 2020, a Consellería de Facenda prevé a primeira emisión de bonos sostibles, integramente orientados a investimentos sociais, medio ambientais e á economía verde e sostible vinculados á Axenda 2030.
Galicia é un exemplo de solvencia e control do déficit, xa que é a comunidade que menos incrementou o seu endebedamento durante a última década, e está entre as comunidades con máis esforzo investidor e á cabeza no pago áxil aos provedores.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
