sábado, 19 de septiembre de 2026
O presidente da Xunta, Alberto Núñez Feijóo, avanzou hoxe a aprobación da Lei de Ordenación do Territorio que actualiza, simplifica e axiliza os diferentes instrumentos da planificación urbanística para evitar posibles desequilibrios e mellorar a coordinación e planificación integral do territorio en termos de igualdade. Culminamos así toda a ordenación urbanística de Galicia, salientou.
Durante a rolda de prensa do Consello, Feijóo aseverou que esta actualización baséase nos principios de coordinación, cooperación interadministrativa, racionalidade e planificación. Con este texto, seguimos a liña iniciada coa redacción da Lei do Solo, dixo, subliñando que se trata de acadar os obxectivos sinalados pola Estratexia Europea de Ordenación do Territorio e de solucionar as novas necesidades que durante estes 25 anos fomos detectando, tendo en conta que a norma vixente é de 1995.
Así mesmo, explicou que se establece un único procedemento de tramitación para todos os instrumentos de ordenación do territorio. E outra das novidades, engadiu, é que o documento achega maior seguridade á figura de plan sectorial -o instrumento que ordena e regula a implantación de actividades sectoriais no territorio-, concretando e actualizando a súa definición para diferenciala do concepto de proxecto sectorial.
En definitiva, a lei contempla 4 figuras de ordenación diferenciando entre: as directrices de ordenación do territorio; os plans territoriais integrados e especiais; os plans sectoriais; e os proxectos de interese autonómico, unha figura que substitúe aos proxectos sectoriais de incidencia supramunicipal.
Estes serían os catro instrumentos que temos á nosa disposición para ordenar o territorio de forma igualitaria e coherente nos 313 concellos galegos, abundou, e sobresaíu que isto é unha garantía para o investimento, para o crecemento ordenado, para un urbanismo con principios e para que todo o mundo saiba exactamente que se pode facer.
A nova lei, concluíu Feijóo, reforza unha serie de obxectivos para mellorar a calidade de vida dos habitantes como: procurar un desenvolvemento equilibrado de toda a Comunidade, garantir a accesibilidade de toda a poboación ás infraestruturas e servizos, mellorar a relación do medio urbano e o rural, e potenciar o desenvolvemento económico sustentable.
Pola súa banda, a conselleira de Medio Ambiente, Territorio e Vivenda, Ángeles Vázquez, destacou que, en liñas xerais, a nova Lei pretende ser unha normativa máis simple, útil, eficiente e práctica que a norma vixente. Nese sentido, apostouse por unha simplificación administrativa, tanto do número de figuras coma no procedemento da súa tramitación.
Ao igual que se fixo na Lei do solo, e co ánimo de acadar una simplificación administrativa, intégrase o procedemento ambiental e a tramitación do instrumento de ordenación, evitando ter que acudir a diversas normas para identificar que procedemento resulta aplicable.
Defendeu o traballo do Goberno galego a prol do territorio e da súa ordenación, que hoxe suma un novo instrumento en forma de norma de carácter supramunicipal, co que garantir esa mesma igualdade de oportunidades a nivel da Comunidade, co fin de corrixir os posibles desequilibrios resultantes da variedade que presenta o territorio de Galicia. Ángeles Vázquez concluíu que a nova Lei de Ordenación do Territorio é a última peza da ordenación territorial de toda Galicia, polo que o Goberno galego culminou o proceso de regulación urbanística e agora éntrase nun chanzo superior, que é a supramunicipalidade.
Medio milleiro de investigadoras e investigadores e máis de 150 actividades científicas nas sete cidades galegas: Vigo, Ourense, Pontevedra, Santiago, A Coruña, Ferrol e Lugo. Así se celebrará en Galicia a sexta edición da Noite Galega das Persoas Investigadoras, G-Night 2026, unha actividade na que a comunidade científica galega une talento e esforzos co obxectivo de achegar a ciencia á cidadanía e espertar vocacións científicas, ao tempo que se ofrecen propostas de lecer científico, cultural e educativo para toda a familia.
A Xunta de Galicia reclama ao Goberno central medidas estruturais de apoio ao sector agrogandeiro. Do mesmo xeito, esíxese que se teña en conta a realidade de cada territorio á hora de levar a cabo estas actuacións, que deben executarse de xeito urxente. Así o trasladou a conselleira do Medio Rural, María José Gómez, na Conferencia Sectorial celebrada en Madrid, na que se dirixiu ao ministro de Agricultura, Pesca e Alimentación, Luis Planas, para facer estas reclamacións. Alí, reafirmou tamén o compromiso do Executivo galego con este sector.
