viernes, 6 de noviembre de 2026
A Delegación Territorial da Xunta en Lugo acolleu hoxe a presentación da XLVIII edición de O Nadal en Begonte, ao tempo que inauguraba a primeira das actividades incluídas na programación, a exposición Imaxes e Palabras, que recolle achegas de máis de medio cento de artistas sobre o evento.
O principal atractivo, o famoso Belén electrónico -declarado de Interese Turístico Galego-, permanecerá aberto entre o próximo 5 de decembro e o 25 de xaneiro de 2020. Cada ano recibe entre 30.000 e 40.000 visitas.
Na presentación participaron o delegado territorial da Xunta en Lugo, José Manuel Balseiro; Xesús Domínguez Guizán e Xulio Xiz, presidente e vicepresidente respectivamente da entidade organizadora, o Centro Cultural Xosé Domínguez Guizán; e o tenente alcalde de Begonte, Luís Luaña, entre outros.
A principal novidade da presente edición radica na reforma das instalacións. A Consellería de Cultura e Turismo financiou con 30.000 euros as obras que recentemente acometeu o concello para mellorar a seguridade, comodidade e accesibilidade do Belén. Tamén no Nacemento incorporáronse e renováronse algunhas figuras que, como sempre, fan referencia aos traballos agrarios tradicionais nunha aldea da Chaira (a malla, o pastoreo...).
Así mesmo, o Certame Galego de Arte José Domínguez Guizán ten nesta ocasión como temática expresa a loita contra a violencia sexual. Como vén sendo habitual, convócanse tamén o Certame Xornalístico Begonte e o Nadal, o Certame de Debuxo Infantil sobre o Nadal, e o Certame Nacional de Poesía sobre o Nadal
Os actos de inauguración do Belén comezarán na Igrexa Parroquial de Begonte ás 18.00 horas e o pregoeiro será o cóengo Félix Villares Mouteira, chanceler do Bispado de Mondoñedo-Ferrol, arquiveiro da diocese e do Seminario, e responsable bispal de Patrimonio.
Poemas e fotografías
A programación do Nadal begontino inclúe a exposición Imaxes e Palabras, que recolle anacos de poemas de 40 autores que corresponden a traballos premiados nalgún dos 43 certames de Poesía sobre o Nadal convocados polo Centro Cultural José Domínguez Guizán. Entre os poetas figuran Xosé Otero Canto, Marica Campo, Carlos López e Martiño Maseda, presentes hoxe na inauguración.
As fotografías amosan distintas escenas do Belén e pertencen aos membros do Grupo Fonmiñá Miguel Calvo, Miguel Fraga, Fernando Gago, José Manuel Guisasola, Gerardo Méndez e Eduardo Ochoa.
A mostra permanecerá na sede da Xunta en Lugo ata o martes día 10 de decembro para viaxar despois ata Mondoñedo.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
