viernes, 6 de noviembre de 2026
Galicia lanzará no vindeiro ano 2020 a primeira emisión de bonos sostibles da Comunidade Autónoma. Estes bonos estarán integramente orientados aos investimentos sociais e medio ambientais, á economía verde e sostible e vinculados á Axenda 2030.
Así o confirmou hoxe o conselleiro de Facenda, Valeriano Martínez na inauguración en Santiago das XXVI Xornadas de Política Financeira organizadas polo banco BBVA onde lembrou que este ano, a Comunidade galega retornou aos mercados financeiros froito da confianza que Galicia aporta aos investidores o que permite aproveitar as condicións que ofrece o mercado, con abundante liquidez, elevada demanda e os tipos de interese historicamente baixos.
Orzamentos 2020
Durante a súa intervención, o titular de Facenda tamén fixo mención aos orzamentos da Xunta para o ano 2020 nos que segundo sinalou se inclúe o maior gasto social da historia. Nunca antes se investiu tanto en Galicia na sanidade pública, na educación pública e nos servizos sociais públicos subliñou.
Valeriano Martínez sinalou que estas contas buscan favorecer a adquisición de vivendas e o asentamento en zonas pouco poboadas, por iso se reforzan as rebaixas de impostos xa iniciadas nestas zonas en 2016 como a rebaixa do 7% ao 5% do Impostos de Transmisións Patrimoniais para a compra de vivendas habituais nas zonas menos poboadas de Galicia. Con esta rebaixa, comprar unha vivenda no rural galego terá a menor fiscalidade de España, apuntou o conselleiro.
Tamén se rebaixa do 10% ao 4% este imposto para o resto de compras de vivendas en zonas pouco poboadas co obxectivo de dinamizar a actividade mediante a restauración e a recuperación do patrimonio no rural e mellorar os servizos. A isto hai que engadir a eliminación dos impostos no rural para menores de 36 anos, familias numerosas e persoas con discapacidade.
Ademais, o conselleiro sinalou que os presupostos do vindeiro ano complementan o seu esforzo en gasto social e demografía co maior esforzo investidor de España, tendo en conta como prioridade o reequilibrio territorial para favorecer a igualdade de oportunidades.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
