viernes, 25 de septiembre de 2026
A directora de Turismo de Galicia, Nava Castro; a delegada territorial da Xunta en Vigo, Corina Porro, e o presidente da Autoridade Portuaria en Vigo, Enrique López Veiga, presentaron hoxe en Vigo a exposición Camelia e traxe galego, unha parella perfecta, que poderá visitarse no Tingado do Porto os vindeiros 16 e 17 de novembro.
Trátase dunha mostra expositiva itinerante que rende homenaxe ao traxe tradicional galego e onde se mesturarán máis de 200 variedades de camelia con pezas como mantóns, panos, zapatos, capelinas, dengues, San Cosmeiros e cofias, entre outros. Ademais, como novidade, tamén se incluirán varios traxes do Ballet Rey de Viana. Neste contexto, Corina Porro subliñou o fondo vencellamento de Vigo e Galicia con esta flor: A camelia está presente nas rúas da cidade e leva o nome unha das súas arterias principais, a Avenida das camelias e animou aos vigueses a visitar en familia a exposición.
Como explicou a directora de Turismo de Galicia, Nava Castro, esta exposición é posible grazas ao traballo dos máis de 20 coleccionistas galegos que presentarán na mostra as súas flores cultivadas. Incidiu, ademais, na importancia de exposicións como esta que axudan a poñer en valor un dos recursos turísticos máis orixinais cos que conta Galicia e que é especialmente atractivo en época de tempada baixa, coincidindo coa súa máxima floración.
Lembrou, ademais a aposta do Goberno galego por poñer en valor este recurso turístico único a través de iniciativas como a Ruta da Camelia, que percorre Galicia a través de 12 pazos e xardíns e onde o Parque do Castro e o Pazo Museo Quiñones de León forman parte do seu percorrido.
Entrada gratuíta
Tras o seu paso por Santiago de Compostela o ano pasado, a Camelia de Galicia-Traxe galego, unha parella perfecta porá en valor a cultura galega, a natureza e os atractivos que a Ruta da Camelia ofrece a través das súas doce paradas por toda a xeografía galega. Para a súa posta en escena cóntase tamén co apoio de Artesanía de Galicia.
Iniciativas como esta exposición son peza clave na nosa aposta pola diversificación de fluxos e a ampliación de circuítos que visitar no noso destino, explicou Nava Castro. Debido á particularidade da exposición, con flor natural cortada, a mostra permanecerá aberta dous días en horario ininterrompido de 12,45 a 20,00 horas o sábado 16 de novembro e de 11,00 a 19,00 horas o domingo 17 de novembro, con entrada gratuíta.
O calendario de Programación Kármica arranca este 25 de setembro con Taïn na Sala Guión de Pontedeume. A seguinte cita será o 16 de outubro, con Camellos e Cora Yako en La Conservera de Viveiro, mentres que o 24 de outubro actuarán Javier Lago e Santi Araújo na Pousada da Galiza Imaxinaria de Boiro. O ciclo chegará precisamente á sala que acolle hoxe a súa presentación, A Cofradía de Vilanova de Arousa, o 27 de novembro, coas actuacións de Montedapena e Nuntia. O programa de 2026 pecharase o 26 de decembro na Pousada da Galiza Imaxinaria con Portosanto e Hermanos Visi.
O Instituto Nacional de Estatística (INE) publicou este martes os datos da enquisa de ocupación hoteleira na comunidade galega, que revelan que os hoteis e pensións galegas ingresaron nos oito primeiros meses do ano 334,7 millóns de euros, que revelan un incremento do 6,6% con respecto ao mesmo período do pasado ano. A rendibilidade hoteleira medra nos oito primeiros meses do ano o 7,5%. Só no mes de agosto, o sector tivo uns ingresos de 92,4 millóns de euros que se traducen nunha suba do 8,8% con respecto ao mesmo mes do ano pasado. Por primeira vez supérase a barreira dos 90 millóns de euros de ingresos no mes de agosto rexistrando un máximo histórico.
