domingo, 8 de noviembre de 2026
Dúas actrices interpretan máis de dez personaxes nun quebracabezas de vidas moi descoñecidas para moitos de nós, pero que tentan ser felices como o resto do mundo. Esther Aja, Nacho Martín e Victoria Teijeiro compoñen un elenco que se move na escenografía ideada por Alicia de Miguel e Ikerne Jiménez. A potencia do espectáculo reside no seu contido social tanto como na posta en escena, cunha estética sinxela que non fai concesións ao artificio nin ao sentimentalismo.
A primeira das funcións no escenario do Centro Dramático Galego (CDG) será o xoves (20,30 h.) e incluirá un coloquio co equipo da compañía ao seu remate. O venres haberá dous pases matinais para escolares e, xa pola tarde, retomaranse os de público xeral, que se estenderán ao sábado e ao domingo (Día do Espectador, ás 18,00 h.). As localidades están xa á venda no web entradas.abanca.com e tamén estarán dispoñibles no despacho de billetes nos días de apertura desde dúas horas antes do comezo do espectáculo.
A estadía de La Quintana no Salón Teatro complétase coa proxección da película A gran voda 2.0, realizada pola asociación de teatro inclusivo La Quinta del Arte. Rodado na madrileña praza de Lavapiés, o filme é unha falsa voda entre dúas persoas con discapacidade e nel participaron máis de 80 actores con e sen diversidade funcional (afeccionados e profesionais). Poderá verse o sábado ás 18,00 h., con entrada gratuíta.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
