domingo, 19 de abril de 2026
O conselleiro de Facenda, Valeriano Martínez, avanzou hoxe que a Xunta de Galicia recibiu unha carta do Ministerio de Facenda na que se confirma que o Goberno central non vai pagar máis da metade da débeda que mantén coas comunidades autónomas, e que no caso concreto de Galicia ascende a uns 700 millóns de euros, 530 dos cales están incluídos nos Orzamentos para 2019.
Nunha rolda de prensa, o titular de Facenda explicou que esta é a primeira vez que neste 2019 o Goberno central se dirixe á Comunidade Autónoma para explicar a situación dos impagos que mantén con Galicia polo bloqueo dos ingresos procedentes do sistema de financiamento autonómico, unha situación que non ten precedentes e que afecta directamente a todas as comunidades de réxime común.
Na carta, o Ministerio de Facenda sinala que non ten previsto pagar os 170 millóns de euros de incentivos, que a Galicia lle corresponden polo cumprimento dos obxectivos fiscais dos anos 2017 e 2018, por estar o Goberno en funcións, e tamén indica que o Goberno central tampouco vai pagar os 200 millóns da mensualidade do IVE, cartos que o Goberno xa ten en caixa pero que se nega a transferir. Esta negativa que o Ministerio de Facenda está a comunicar formalmente a Galicia ten unha afectación global ao resto de comunidades autónomas, o que implica que o Goberno vai seguir retendo uns 2.500 millóns de euros.
En canto á transferencia das cantidades xa actualizadas das entregas a conta para 2019
uns recursos que foron comunicados polo Goberno a Galicia en xullo de 2018-, o Ministerio de Facenda tampouco garante o pago deses 330 millóns de euros e agora limítase a sinalar que está "estudando alternativas". Neste sentido, o Goberno afirma que este bloqueo é consecuencia do rexeitamento polas Cortes do proxecto de Lei de Orzamentos para 2019, un feito que se produciu o pasado mes de febreiro, é dicir, hai máis de sete meses.
Non ao Consello de Política Fiscal
Ao mesmo tempo, o Ministerio de Facenda tamén confirma a súa negativa a convocar de xeito urxente o Consello de Política Fiscal e Financeira, pese ás solicitudes realizadas por varias comunidades autónomas, Galicia entre elas. Na carta, o Ministerio di que non parece procedente realizar esta convocatoria estando en funcións, pese a que este órgano coordinador leva máis dun ano sen reunirse, e pese a que o propio Goberno tamén recoñece que prevé convocalo antes de que remate o ano, porque así o obriga o regulamento do Consello.
Diálogo e non chantaxe
Na súa intervención, Valeriano Martínez advertiu de que o Goberno ten a obriga de dialogar, non de chantaxear. Xa estamos a mediados de setembro e xa pasou o tempo das escusas, indicou o conselleiro, que avanzou que a Xunta de Galicia vai seguir reclamando os cartos que se nos adebedan, porque así nolo pediu o Parlamento e porque son cartos que lexitimamente nos corresponden.
Que os galegos teñan a tranquilidade de que a Xunta de Galicia non se vai render, e coa máxima serenidade e a máxima lealdade continuaremos traballando para que o Goberno remate con este bloqueo, concluíu o titular de Facenda.
O FIV de Vilalba volverá reunir na localidade lucense unha programación destacada da escena independente e alternativa estatal, cun cartel no que figuran nomes como Carlos Ares, Alcalá Norte, La M.O.D.A. e Ángel Stanich, xunto a outras propostas moi presentes no panorama actual como Repion, Puño Dragón, Celia Becks, Futuro Alcalde, Grande Osso e Rapariga DJ. A boa resposta do público nas últimas semanas confirma, ademais, a gran acollida desta edición, coa previsión de que Vilalba volva encherse de ambiente festivalero a próxima fin de semana. A programación do FIV de Vilalba desenvolverase entre o Escenario Vibra Mahou, o Escenario #Fiver by Lactalis e a Zona DJ, consolidando un formato que combina os grandes concertos nocturnos coa actividade diúrna do sábado.
Galicia sitúase como a comunidade autónoma con menor porcentaxe de pacientes que agardan máis de 60 días por unha consulta co especialista. Así o referendan os datos publicados polo Ministerio de Sanidade sobre listas de espera no Sistema Nacional de Saúde a peche de 2025. Segundo os datos, en decembro de 2025 a comunidade galega situouse como a cuarta rexión española con mellores tempos medios de espera no ámbito das primeiras consultas. Neste eido, o Servizo Galego de Saúde rexistrou unha media de 63 días de espera, fronte aos 102 do Sistema Nacional de Saúde. Estas cifras reflicten que os galegos esperan 39 días menos para acceder a unha consulta co especialista que a media dos españois.
