viernes, 6 de noviembre de 2026
O presidente da Xunta, Alberto Núñez Feijóo, reivindicou hoxe a cooperación leal Galicia-Norte de Portugal para afrontar os retos futuros e seguir mellorando a vida dos veciños a ambos lados da raia con máis e mellores servizos e infraestruturas. Para logralo, aseverou que ambos territorios seguirán traballando en Europa para que o novo período orzamentario, que está nestes momentos en definición, manteña a cooperación territorial co peso que merece.
Durante o acto de clausura da presentación dos resultados do Programa Operativo de Cooperación Transfronteiriza Galicia-Norte de Portugal (POCTEP), Feijóo falou do traballo feito pero tamén do moito que queda por facer, incidindo en que neste momento xa se está a preparar un novo Programa de investimentos conxuntos. E seguimos defendendo xunto a comunidades do noroeste peninsular un Corredor Ferroviario Atlántico, ademais da necesidade de que se prolongue a actual liña de viaxeiros de altas prestacións que vai de Coruña a Vigo ata a Porto, e da execución da saída sur de Vigo prolongando a actual liña de alta velocidade engadiu, referíndose tamén ao reto do envellecemento e a dispersión da poboación.
Ao longo da súa intervención, o presidente do Goberno galego incidiu en que máis alá da relación entre institucións, a cooperación transfronteiriza Galicia-Norte de Portugal implica a todos os niveis da sociedade e tradúcese en beneficios concretos para os cidadáns a ambos lados da fronteira, como se pon de manifesto na execución do Poctep, un exemplo claro da solidez desta relación que xa é de terceira xeración.
Estamos a falar de proxectos concretos, mesurables e útiles que implican o traballo e a confianza de empresas, administracións e institucións de todo tipo a un e outro lado da raia, dixo, recordando que no período 2014-2020, contáronse xa con 131 millóns para iniciativas relacionadas co I+D+i, co fomento do emprego, coa protección do medio ambiente ou coa mellora da capacidade institucional das administracións e dos servizos que presta. E que benefician a axentes tan diversos como universidades, centros tecnolóxicos, empresas, parques naturais ou cámaras de comercio e administracións públicas.
Así, só na actual convocatoria 2014-2020, estanse a desenvolver 80 iniciativas que contribuirán a dinamizar a Eurorrexión como xa o fixeron outros proxectos máis alá dos Poctep, entre os que destacan: a interconexión dos servizos de emerxencia e a coordinación dos 112 a ambos lados; o programa de mobilidade universitario Iacobus; a cooperación en materia sanitaria, coordinando e facilitando o acceso a servizos especializados nos centros de referencia das comarcas fronteirizas; os avances e melloras no Camiño Portugués a Santiago; e a posta en marcha da estratexia Ris 3 Conxunta, a primeira presentada por unha eurorrexión.
O responsable do Executivo autonómico concluíu asegurando que ambos territorios seguirán traballando xuntos e dando continuidade a unha cooperación leal que antes iniciaron outros: como o presidente Fraga e Luís Braga da Cruz.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
