viernes, 6 de noviembre de 2026
Hai que destacar que neste momento, disponse de máis de 4.500 operacións seleccionadas e que Galicia cumpriu coa regra n+3 e co exame de rendemento, o que implica que é unha comunidade cumpridora e que o ritmo actual de execución dos indicadores prevé o cumprimento das metas previstas a 2023.
A reunión estivo copresidida polo director xeral de Política Financeira, Tesouro e Fondos Europeos da Xunta de Galicia, David Cabañó e por un representante da Dirección General de Fondos Comunitarios, do Ministerio de Hacienda. Contou ademais, con representantes deste ministerio, da Comisión Europea, de diferentes departamentos da Administración galega, e das organizacións económicas e sociais máis representativas de Galicia.
Principais eixes e actuacións
No eixe 1 centrado na I+D+i concedéronse axudas para proxectos colaborativos de I+D+i orientada ao mercado, desenvolvidos en cooperación entre empresas innovadoras galegas e organismos de investigación, axudas á mellora da capacidade de innovación das empresas; ou á incorporación das TIC nos sectores produtivos de Galicia. Por exemplo, a 31 de decembro, beneficiáronse 348 empresas, xerando un investimento de máis de 40 millóns.
No eixe 2 de mellora do uso e calidade das TIC, seleccionáronse operacións por importe de 132 millóns de euros para servizos e administración electrónica como a confianza e a educación dixital, a sanidade dixital ou a administración xudicial electrónica.
Para mellorar a competitividade das pemes do eixe 3 prestáronse servizos de asesoramento a centos de empresas e outorgáronse axudas ao emprendemento, para fomentar a internacionalización, para proxectos de investimento empresarial; proxectos piloto da industria 4.0 ou axudas á dixitalización das pemes, aliñadas coa Estratexia Industria 4.0.
No eixe 4 destinado a favorecer o paso a unha economía baixa en carbono en todos os sectores, desenvolvéronse 31 sendas ciclistas-peonís; implantáronse proxectos de equipamentos térmicos de biomasa; leváronse a cabo actuacións de eficiencia enerxética en centros educativos, xulgados, edificios administrativos e hospitais. Por outra banda, para promover a adaptación ao cambio climático, melloráronse as redes de calidade das augas e do aire, as redes de observación meteorolóxica e contribuíuse á configuración da Estratexia Galega de Cambio Climático e Enerxía.
No eixe medioambiental financiáronse medidas de xestión de residuos domésticos e industriais, melloras en sistemas de saneamento, actuacións de conservación de bens do patrimonio natural e cultural galego; e continuouse co acondicionamento e sinalización das diferentes rutas en Galicia dos Camiños de Santiago.
No que respecta ás infraestruturas sociais e educativas, ademais das axudas a entidades de iniciativa social para servizos de inclusión social, e a concellos para mellorar a accesibilidade nos edificios e espazos de uso público, destacan os investimentos en escolas infantís e a construción de novos centros educativos como o IES de Soutomaior, con 480 prazas ou o CEIP de Culleredo, con capacidade para 350 alumnos.
Temas abordados polo Comité de Seguimento FEDER
Durante a celebración do Comité, abordouse polo miúdo a situación do Programa Operativo, o repaso das operacións seleccionadas e o grado de desenvolvemento das actuacións e as perspectivas de execución. Tamén se analizou a evolución da estratexia de comunicación, así como os avances nos plans de avaliación común e específico do programa.
Santiago acollerá tamén a vindeira semana a celebración do Comité de Seguimento do Fondo Social Europeo (FSE) 2014-2020, no que participarán representantes da Administración Autonómica, do Ministerio de Traballo e da Comisión Europea.
Este Comité enmárcase nunha actuación cofinanciada polo Fondo Europeo de Desenvolvemento Rexional no marco do Programa Operativo FEDER de Galicia 2014-2020 con cargo ao Eixe prioritario de Asistencia Técnica deste fondo, cunha taxa de cofinanciamento do 80%. "Unha maneira de facer Europa.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
