domingo, 19 de abril de 2026
A secretaria xeral de Emprego, Covadonga Toca, destacou hoxe a boa evolución do paro rexistrado en abril, que baixou na comparativa co mesmo mes de 2018 e tamén con respecto a marzo deste ano. As afiliacións á Seguridade Social e as contratacións tamén aumentaron na evolución anual e mensual.
Toca, en primeiro lugar, explicou, na visita que realizou á empresa Pauta Música en Santiago, que Galicia é a comunidade autónoma na que máis baixou o paro no último ano cunha caída do 8,81%, superando o ritmo de baixada do Estado en 3,64 puntos. A Comunidade galega conta con 16.065 desempregados menos que hai un ano (44 parados menos ao día), o que sitúa a Galicia en niveis de paro moi inferiores aos de hai 10 anos. Así mesmo, apuntou que a Comunidade galega suma xa seis anos consecutivos de descensos do paro nun mes de abril.
Con respecto ás afiliacións, aumentaron nun 2,14%, o segundo maior incremento nun mes de abril desde o inicio da crise económica. Deste xeito, Galicia sumou no último ano 21.175 afiliacións máis (58 ao día), rexistrando seis anos de subidas consecutivas nun mes de abril. O dato sitúa á comunidade nun nivel superior ao reflectido hai 9 anos.
A contratación tamén continúa en aumento, mentres que no Estado baixa, e, ademais, o paro baixa nos colectivos prioritarios para a Xunta. O desemprego descende, así, entre os menores de 30 anos (-9,52%), nas mulleres (-7,73%) e nos parados de longa duración (-14,48%), o que supón que 3 de cada 4 persoas que saíron do paro no último ano pertencían a este colectivo. O paro tamén caeu nas catro provincias galegas, nas sete grandes cidades e en todos os sectores de actividade, liderando o descenso a construción (-19%) e a industria (-9,12%), ambos por riba da media xeral de Galicia (-8,81%), seguidos da agricultura e a pesca (-8,17% e os servizos (-7,31%).
En canto ás provincias, lidera a caída do paro Lugo (-10,85%), seguida da Coruña (-9,44%), Pontevedra (-8,65%) e Ourense (-5,34%).
Evolución mensual
Toca engadiu que o paro tamén baixou con respecto ao mes de marzo nun -2,70%, o segundo maior descenso desde o ano 2007. Galicia rexistrou 4.615 persoas menos no paro, preto de 154 persoas menos ao día. As afiliacións tamén subiron na evolución mensual (+0,62%, é dicir, 6.186 afiliacións, son 206 ao día) e a contratación aumentou nun 11,16%, unha suba de case 8 puntos maior que a rexistrada no Estado. A indefinida incrementouse nun 1,64%, mentres que en España caeu nun -2,69%. Na Comunidade galega, a contratación tamén aumenta a tempo completo nun 12%.
Estabilidade e confianza
A secretaria xeral de Emprego indicou que a creación de emprego vén marcada pola estabilidade da Comunidade galega, un dato que confirma, segundo Toca, o crecemento sostible e progresivo que vive Galicia.
Toca sinalou que Galicia está apostando pola formación de calidade adaptada á demanda do tecido produtivo para dar resposta aos novos restos da Industria 4.0. Explicou, así mesmo, que para crear emprego é preciso acompañar ao tecido empresarial e, por iso, lembrou que a Xunta está incentivando a contratación nas empresas a través do programa Galicia Emprega e impulsando a cualificación a través do Plan galego de formación.
A Administración autonómica, ademais, avoga pola innovación, a internacionalización e o emprendemento. Para Toca, o obxectivo prioritario ten que ser o de dar respostas ao cidadán para incrementar a súa calidade de vida.
Para rematar, resaltou que a boa evolución do paro se suma aos bos resultados acadados coa última EPA, a mellor dun inicio de ano da última década cunha taxa de paro mellor que a de España en 2,23 puntos e que reflicte que case tres de cada catro asalariados galegos son indefinidos. Lembrou, ademais, que Galicia vén rexistrando récords sucesivos de exportacións; leva catro anos consecutivos medrando na contorna do 3%, crecendo o PIB por habitante a mellor ritmo en Galicia que en España; e conta co maior incremento da produción industrial da última década.
Visita a Pauta Música
Na visita que a secretaria xeral realizou a Pauta Música, resaltou a aposta da Xunta polo emprendemento sinalando que a Administración autonómica apoia aos autónomos con diversos programas que inclúen axudas para o inicio de actividade, a contratación de persoas indefinidas, a consolidación da súa actividade e con apoios para promover a conciliación.
O FIV de Vilalba volverá reunir na localidade lucense unha programación destacada da escena independente e alternativa estatal, cun cartel no que figuran nomes como Carlos Ares, Alcalá Norte, La M.O.D.A. e Ángel Stanich, xunto a outras propostas moi presentes no panorama actual como Repion, Puño Dragón, Celia Becks, Futuro Alcalde, Grande Osso e Rapariga DJ. A boa resposta do público nas últimas semanas confirma, ademais, a gran acollida desta edición, coa previsión de que Vilalba volva encherse de ambiente festivalero a próxima fin de semana. A programación do FIV de Vilalba desenvolverase entre o Escenario Vibra Mahou, o Escenario #Fiver by Lactalis e a Zona DJ, consolidando un formato que combina os grandes concertos nocturnos coa actividade diúrna do sábado.
Galicia sitúase como a comunidade autónoma con menor porcentaxe de pacientes que agardan máis de 60 días por unha consulta co especialista. Así o referendan os datos publicados polo Ministerio de Sanidade sobre listas de espera no Sistema Nacional de Saúde a peche de 2025. Segundo os datos, en decembro de 2025 a comunidade galega situouse como a cuarta rexión española con mellores tempos medios de espera no ámbito das primeiras consultas. Neste eido, o Servizo Galego de Saúde rexistrou unha media de 63 días de espera, fronte aos 102 do Sistema Nacional de Saúde. Estas cifras reflicten que os galegos esperan 39 días menos para acceder a unha consulta co especialista que a media dos españois.
