domingo, 6 de julio de 2025
O presidente do Goberno galego, Alberto Núñez Feijóo, informou en rolda de prensa que o Consello ven de constatar a boa marcha do sector turístico durante a Semana Santa. Feijóo indicou que se cumpriron as mellores previsións cun aumento dos ingresos do 15% e un nivel de ocupación media que chegou a alcanzar o 95% nos días festivos da Semana Santa. Estes datos, aportados polo propio sector a través do Clúster de Turismo, supoñen un balance moi positivo, engadiu.
O presidente da Xunta sinalou que o comportamento turístico de Galicia mellora sobre ás previsións iniciais e medra notablemente respecto ao ano pasado e engadiu que o turismo se consolida como un piar básico da estrutura económica de Galicia.
En termos de ocupación o rango xeral situouse entre o 65% e o 85%, aumentando entre o Xoves e o Sábado Santo ata o 95% e chegando mesmo ao 100% en algunhas zonas como Ferrol, Viveiro ou a Ribeira Sacra. A provincia de Lugo foi unha das zonas que máis medrou cunha ocupación media do 93%, que supón un aumento interanual do 10%. Feijóo sinalou, neste senso, que se nota a candidatura da Ribeira Sacra a Patrimonio Mundial da Unesco e a designación do Xeoparque Montañas do Courel. Ademais, o presidente da Xunta cualificou de espectacular a chegada de 14.000 peregrinos a Santiago de Compostela, un 61% máis que en 2018. Tamén destacou os bos resultados do turismo rural cunha ocupación do 67%.
O Consello da Xunta tamén coñeceu hoxe a resolución da convocatoria de 2019 das axudas para mellorar as infraestruturas turísticas do rural. Feijóo avanzou que se mobilizarán 4,7 M que beneficiarán a 126 concellos das catro provincias para, entre outras cuestións, actuacións de mellora de accesos, recuperación e tratamento paisaxístico, iluminación ornamental ou actuacións dos Bens de Interese Cultural.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
