domingo, 8 de noviembre de 2026
A reportaxe a presentar a concurso consistirá nunha serie de sete imaxes que retraten a actividade emprendedora e creadora nun centro de coworking, debendo reflectir o propio espazo de traballo do Centro de Emprendemento do Gaiás, a súa actividade, servizos, dinámicas, o día a día dos e das súas integrantes, así como os particulares condicionantes do traballo emprendedor. A reportaxe gañadora será galardoada cun premio dotado con 1.200. Para participar cómpre inscribirse ata o 24 de marzo en cidadedacultura.gal.
Ademais, a través da rede social Instagram lánzase un concurso dirixido a instagramers de toda Galicia que os anima a publicar todo tipo de fotografías relacionadas coa temática do emprendemento, entre as que a mellor será premiada con 300. Ambos galardóns estarán outorgados por un xurado especializado composto por profesionais da fotografía, e representantes da Escola de Arte e Superior de Deseño Mestre Mateo, da Cidade da Cultura e da empresa de xestión cultural Correveydile.
Talleres, música, faladoiros e un mercado de emprendemento creativo
A actividade central de CreaGaiás será unha xornada lúdico-formativa especialmente dirixida a persoas emprendedoras ou profesionais do sector creativo, así como a público interesado no emprego da imaxe na contorna dixital ou en coñecer de primeira man as empresas residentes no Centro de Emprendemento no Gaiás, que desde a súa creación apoiou xa a uns 400 proxectos. A xornada, que se desenvolverá a partir das 16h, inclúe un mercado creativo das empresas e persoas emprendedoras residentes no Coworking e Viveiro do Gaiás e dous obradoiros sobre fotografía con teléfonos móbiles e ioga e hixiene postural no entorno profesional. Completan o programa un faladoiro e concerto acústico do dúo xixonés Pauline en la Playa, que esta primavera lanzará un novo traballo discográfico; unha sesión DJ e unha zona de networking e foodtrucks. A asistencia é libre e de balde ata completar capacidade.
Emprendemento na Cidade da Cultura
CreaGaiás é un proxecto organizado pola Fundación Cidade da Cultura de Galicia, a través do seu Centro de Emprendemento Creativo, e a empresa de xestión cultural Correveydile. Conta ademais coa colaboración da Escola de Arte e Superior de Deseño Mestre Mateo, e a empresa Daveiga. Pódese consultar máis información no web www.cidadedacultura.org.
Na súa segunda edición, CreaGaiás volve sumarse á programación da Cidade da Cultura arredor ao emprendemento no eido das industrias culturais, campo que, xunto coa tecnoloxía e a cultura, é un dos tres eixes nos que opera o Gaiás. O seu Centro de Emprendemento ofrece un espazo de coworking, un viveiro de empresas e unha área tecnolóxica na que compañías punteiras, como Vodafone, desenvolven proxectos de apoio a start-up galegas. O CEM ofrece un programa de titoría e acompañamento na posta en marcha de modelos de negocio, maduración de ideas empresariais, asesoría financeira, networking e showrooms.
Máis aló dos recursos dirixidos aos emprendedores/as con sede na Cidade da Cultura, o Gaiás desenvolve cada ano unha ampla programación que ten por obxecto estimular o talento e crear cultura emprendedora en Galicia, xa sexa a través de accións formativas ou eventos como Atlantic Emprende +Gaiás encontro profesional arredor do sector musical que se celebra o vindeiro 30 de marzo ou os Premios Gaiás Sixto Seco que levan xa seis edicións premiando os mellores proxectos emprendedores.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
