domingo, 6 de julio de 2025
A cooperación da UE en Libia, e en particular a que o Comité Europeo das Rexións está a impulsar a través das rexións e cidades que o integran, é unha resposta á desestruturación política, á convulsión social e á inseguridade que padece Libia desde 2011, que erosionaron os seus servizos públicos, mantido ás súas institucións illadas internacionalmente e transformado ao país nunha das principais rutas de tránsito de migrantes cara a Europa. Aínda que a crise afectou á saúde, á educación, aos medios de vida e ás perspectivas dos cidadáns de Libia, numerosos entes rexionais e locais conseguiron manter servizos básicos e moitos gozan dun mandato electoral continuado e dunha sólida lexitimidade popular. Ao longo da crise, son precisamente as cidades e as rexións libias as que achegaron una certa estabilidade ás súas poboacións.
En liña con este obxectivo da UE, o Comité Europeo das Rexións (CdR), a través da denominada Iniciativa de Nicosia, desenvolve con varias rexións e cidades libias unha estreita relación política, que se ve reflectida, cada vez máis, a nivel práctico. Esta relación ten o triplo obxectivo de contribuír a mellorar os servizos públicos en Libia, elevar as condicións de vida dos seus cidadáns e axudar aos seus entes rexionais e locais a acceder á comunidade internacional. A iniciativa é tamén unha contribución á estabilización de Libia, nun momento en que a axitación política e a inseguridade terminaron dificultando a cooperación co país. Esta iniciativa do Comité das Rexións ten o apoio político e financeiro do Servizo Europeo de Acción Exterior e da DG NEAR (Dirección Xeral de Política de Veciñanza e Negociacións de Ampliación) da Comisión Europea, a través do Instrumento para a Administración Pública da UE para Libia.
Diversas rexións e cidades da UE xa proporcionan apoio a Libia. A Rexión de Murcia está a desenvolver unha iniciativa sobre a Xestión da auga, a portuguesa de Vila Real, sobre atención sanitaria primaria, ou a belga de Amberes sobre xestión de residuos.
No marco as reunións do Comité Europeo das Rexións da comisión CIVEX, hoxe tivo lugar en Sevilla unha reunión da Iniciativa de Nicosia co obxectivo de identificar posibles áreas de cooperación conxunta coas entidades libias, definir o tipo de apoio que se pode realizar (experiencia, formación, loxística, financeira, etc.), ou o intercambio de representantes rexionais ou locais co fin de identificar ámbitos comúns de colaboración.
Na xuntanza de Sevilla tamén participaron representantes da Asemblea Rexional e Local Euromediterránea (ARLEM), unha asemblea de representantes locais e rexionais da Unión Europea e os seus socios do Mediterráneo. O Comité Europeo das Rexións e as asociacións territoriais que actúan neste contexto crearon a ARLEM en 2010 para permitir aos representantes elixidos por sufraxio das tres beiras do Mar Mediterráneo representar politicamente aos seus entes locais e rexionais. As rexións e cidades que integran ARLEM e a Iniciativa de Nicosia propuxeron que Galicia lidere un proxecto de pesca e acuicultura que facilite a transmisión de coñecementos e de experiencias nos distintos aspectos desta actividade.
Ademais, grazas á nosa solvencia en materia pesqueira, a proposta entróncase co noso liderado en diversos ditames do CdR nos ámbitos da acuicultura e de cooperación ao desenvolvemento, dos que que a Xunta participou como relatora. Unha primeira actividade a levar a cabo este ano,podería ser a visita dunha delegación de representantes libios a Galicia para unha primeira toma de contacto e exploración de posibles vías de colaboración.
Na reunión de Sevilla participaron responsables políticos libios, representantes locais e rexionais europeos, membros do Comité Europeo das Rexións e de institucións europeas. A reunión foi inaugurada hoxe pola mañá polo presidente da Junta de Andalucía, Juan Manuel Moreno Bonilla.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
