martes, 8 de julio de 2025
A directora da Axencia Galega de Innovación (Gain), Patricia Argerey, visitou en Narón a enxeñería Ártabro-Samdeu, con experiencia nos sectores naval, medioambiental, enerxía e construción, co obxectivo de facer un seguimento do proxecto Modul, apoiado na última convocatoria do programa de axudas Conecta Peme da Xunta.
A iniciativa, dotada cun orzamento próximo aos 900.000 euros e apoiado cunha axuda do 54%, persegue desenvolver un sistema modular que permita o uso de enerxías limpas en rexións remotas, preparado para operar en climas extremos e que sexa simple en canto á súa instalación, despregue e traslado. O proxecto está liderado polo grupo lucense Norvento, coa participación da enxeñería naronesa e a consultora de I+D TEMHA.
Existen no mundo zonas afastadas onde as necesidades de enerxía eléctrica se abastecen con combustibles fósiles (zonas de Rusia, Escandinavia, o norte de América, o centro de África ou Latinoamérica). Esta solución tecnolóxica responde a unha necesidade identificada de mellora loxística na instalación de sistemas de enerxía renovable neste tipo de emprazamentos, abaratando custos.
Espérase que este sistema contribúa a situar Galicia nunha posición de liderado mundial en tecnoloxía para a electrificación renovable e remota. Ademais, este proxecto contribuirá a acadar os retos 1 e 2 da Estratexia de Especialización Intelixente (RIS3) de Galicia, innovando en equipos e tecnoloxía, atopando vías máis eficientes para a loxística da distribución e aproveitando as sinerxías de coñecemento con outros sectores galegos como o naval, para a súa exportación a outros países, e diversificando os sectores industriais tradicionais para promover novos modelos de negocio.
Ártabro-Samdeu é unha empresa familiar con case tres décadas de historia que se dedica á enxeñería e está especializada en proxectos tecnolóxicos e de I+D de alto valor e singularidade. Entre os seus produtos e solucións inclúense estruturas metálicas para usos especiais e solucións loxísticas adaptadas a cada necesidade.
A iniciativa da compañía está apoiada polo programa Conecta Peme da Consellería de Economía, Emprego e Industria que, nesta edición, mobilizará máis de 47 millóns de euros en 54 proxectos de innovación empresarial que implican a 169 empresas o 93% pemes, e 24 centros tecnolóxicos e organismos de investigación xerando 72 empregos cualificados.
O obxectivo desta actuación é estimular a innovación das pemes galegas para fortalecer a competitividade do tecido empresarial galego a través da cooperación entre os diferentes axentes. Desde a súa posta en marcha, no ano 2013, este programa está mobilizando 150 millóns de euros en 187 proxectos de cooperación nos que están a participar 433 empresas o 95% pemes e 81 centros tecnolóxicos e de investigación que están xerando a creación de 530 empregos.
Alfonso Rueda informou de que o Consello 'aprobou a orde para a posta en marcha do Bono Peixe' que ofrecerá 'ata 50 ' para mercar peixe e marisco frescos nos establecementos da comunidade adheridos. Unha medida coa que a Xunta busca 'incentivar o consumo' destes produtos galegos que son sinónimo 'de excelencia e calidade' por todo o mundo e 'facer unha chamada atención' sobre o descenso destes alimentos na dieta que se está a vivir 'a nivel nacional, europeo e mundial e do que Galicia non é allea'.
Galicia segue a ser un referente nacional en calidade ambiental e turística, con 137 bandeiras azuis e 54 sendeiros azuis recoñecidos en marzo. Sanxenxo mantén a súa posición á cabeza do conxunto estatal con 17 praias, 3 portos deportivos (o Real Club Náutico Sanxenxo, o Club Náutico Portonovo e o Porto Deportivo Juan Carlos I) e 1 centro azul (o Centro de Interpretación das Telleiras), ademais de ser o concello que conta co maior número de sendeiros azuis de toda España, cun total de 8 rutas. Galicia mantense entre as tres Comunidades con máis distintivos azuis (tras a Comunidade Valenciana e Andalucía) con 137 galardóns que inclúen praias, portos e centros azuis, ademais de 54 sendeiros azuis recoñecidos en marzo. De feito, concentra unha de cada seis bandeiras azuis concedidas este ano aos areais españois.
