domingo, 12 de mayo de 2024
O Teatro Principal de Ourense anunciou hoxe a carteleira escénica e musical que desenvolverá durante o primeiro semestre de 2019 e dentro da que se inclúen as tres funcións que ofrecerá como espazo asociado á Rede Galega de Teatros e Auditorios, impulsada pola Xunta a través da Axencia Galega das Industrias Culturais (Agadic).
En concreto, exhibiranse os espectáculos teatrais Jane Eyre, producido orixinalmente polo Teatre Lliure de Barcelona e protagonizado por Ariadna Gil, o 10 de febreiro; A leituga, da compañía galega Eme2, o 16 de febreiro; e Carpe diem, da tamén galega Producións Teatráis Excéntricas, o 7 de abril.
Con estas tres propostas, darase continuidade á programación que o Teatro Principal leva a cabo desde hai dúas décadas como integrante da rede da Agadic, dentro da que nos vindeiros días ofrecerá outras cinco montaxes, comezando por Crimen y telón, que Ron Lalá porá en escena este mesmo venres. O resto insírese na programación infantil especial para o Nadal: Artenrúa, que presentará o seu espectáculo homónimo o 26 de decembro; Caramuxo Teatro, que estará o 27 de decembro coa obra Ela, unha homenaxe á pintora Maruxa Mallo; Eme2 Emoción &Arte, que porá en escena o 28 de decembro Contacreques; e Tanxarina Títeres, que chegará o 29 de decembro con A galiña azul, a emblemática peza de Carlos Casares.
O director da Agadic, Jacobo Sutil, detallou estas funcións na presentación da programación completa que o escenario da rúa da Paz desenvolverá de xaneiro a xuño de 2019 e na que tamén interviñeron Rosendo Luis Fernández, vicepresidente da Deputación Provincial, e Olga Mojón, directora do Principal.
Traballo común a prol das artes escénicas
Tras salientar a calidade e variedade desta carteleira, que inclúe outra vintena de citas co teatro, a ópera e a música, Sutil centrouse na actividade que o Teatro Principal desenvolve no marco da Rede Galega de Teatros e Auditorios, da que tamén forma parte o Auditorio Municipal ourensán. Xuntos contribuímos á máxima difusión das artes escénicas na nosa Comunidade, co dobre obxectivo de dinamizar o mercado interior para os espectáculos aquí producidos e de favorecer o acceso do público galego a propostas de éxito de fóra de Galicia.
O director da Agadic adiantou que o circuíto da Xunta xa ten pechado o seu calendario de representacións para o primeiro semestre de 2019, con importantes novidades de xestión interna pero, sobre todo, cunha viva carteleira de 349 citas culturais a cargo de 115 formacións artísticas, maioritariamente galegas, por 40 espazos das catro provincias. Así mesmo, explicou que a Rede Galega de Teatros e Auditorios pechará o ano 2018 despois de ter ofrecido unhas 600 funcións e concertos.
Tivo lugar unha xornada de debate organizada pola Fundación Galicia Europa (FGE) no marco da celebración do Día de Europa co obxectivo de abordar coa mocidade universitaria o estado actual do proxecto de construción europea. No evento colaboraron a asociación xuvenil Equipo Europa e a asociación de debate universitario Retórica da Universidade de Vigo. No evento tratouse o impacto da Unión Europea e das eleccións ao Parlamento Europeo do próximo xuño. A fundación ten en marcha unha campaña en redes sociais para informar á cidadanía galega sobre o traballo das institucións da UE e sobre o seu impacto en Galicia. En liña co seu compromiso con achegar a Unión á xuventude, patente na iniciativa EuroXuventude, a campaña estará principalmente destinada á mocidade.
A Cidade da Cultura de Galicia reivindica na exposición 'Outras historias posibles' a obra de seis artistas contemporáneas vinculadas a Galicia que despuntaron nos anos 80 do pasado século. A mostra, que abrirá a súas portas no Museo Centro Gaiás da Cidade da Cultura a finais deste mes de maio, reúne unha ampla escolma dos traballos de Ana García Pan, Emilia Guimeráns, Anne Heyvaert, Tusi Sandoval, Blanca Silva e Laura Terré co obxectivo de celebrar o seu talento e contextualizar a súa obra, atendendo tanto ás influencias do contexto histórico como aos eventos da vida privada que determinaron o seu devir artístico.
