domingo, 8 de noviembre de 2026
Os reitores das universidades da Coruña e de Vigo, Julio Abalde e Manuel Reigosa, respectivamente, e máis Alfredo Ramos, director xeral de R, asinaron esta mañá na sede do operador galego o convenio para a creación da Cátedra R en Ciberseguridade, a primeira interuniversitaria existente en Galicia. Con esta nova Cátedra quérese promover o desenvolvemento das competencias profesionais do alumnado universitario, mellorar a capacitación e ampliar os coñecementos, técnicos e habilidades dos membros da comunidade universitaria e doutros profesionais.
A meta última é adaptar ese coñecemento ás necesidades da empresa, fomentando a formación continua, a innovación e a investigación na área da Ciberseguridade. Trátase da primeira cátedra na que colaboran á vez dúas universidades galegas, dispostas desta volta a traballar man a man co operador galego R neste eido.
O reitor da Universidade da Coruña resaltou a importancia da Ciberseguridade na sociedade actual e futura. A conectividade a través de Internet e a utilización das redes sociais fai que sexa máis necesario que nunca dispoñer de coñecemento e recursos humanos que permitan facer fronte aos problemas que a nova situación provoca. Disto trata esta Cátedra R en Ciberseguridade, da que Abalde remarcou, ademais, que é a primeira cátedra institucional interuniversitaria, exemplo de colaboración e cooperación no Sistema Universitario de Galicia.
Pola súa banda o reitor da Universidade de Vigo salientou que para a nosa institución, que leva anos traballando no ámbito da Ciberseguridade, é moi importante participar nesta Cátedra, que ademais reforza a nosa colaboración coa Universidade da Coruña, coa que compartimos docencia e investigación neste Máster. Reigosa, que agradeceu a iniciativa de R, destacou que o aumento de ciberataques precisa da incorporación de profesionais expertos en Ciberseguridade, un campo de coñecemento en construción, no que existen moitas posibilidades de desenvolver proxectos e retos profesionais.
Alfredo Ramos, director xeral de R, subliñou a importancia deste acordo que marca un antes e un despois na relación entre os centros universitarios e o sector das telecomunicacións galegas, e abre un vieiro que propiciará a aplicación práctica na sociedade de todo o coñecemento sobre seguridade informática.
Campo de traballo en alza
A chamada Ciberseguridade ou seguridade informática é un terreo de estudo a día de hoxe imprescindible tanto a nivel particular coma empresarial ou institucional, pois compromete cuestións tan sensibles coma poden ser a privacidade, a protección dos datos de corporacións de todo tipo e mesmo segredos de Estado, por citar tan só algúns exemplos da amplitude de implicacións que o termo conleva.
A Ciberseguridade aféctalle ao software (bases de datos, metadatos, arquivos
), ao hardware (equipamentos) e a todo o que, relacionado coa información contida nos sistemas dunha organización supoña para ela un risco no caso de chegar a mans de terceiros, converténdose, desta maneira, en información privilexiada.
Liñas de actuación da Cátedra
Conscientes de todo isto, as devanditas universidades galegas e máis R veñen de deseñar esta Cátedra, que vai ter numerosas e non limitadas liñas de actuación, entre as que destacan as seguintes:
- colaboración na docencia+investigación (Mestrado Interunivesitario en Ciberseguridade)
- creación de programa de captación de talento (alumnado ambas as dúas Universidades)
- creación de espazos para a difusión e o debate sobre Ciberseguridade
- capacitación en competencias relacionadas coa Ciberseguridade tanto dentro da comunidade universitaria coma fóra dela, tendo en conta as necesidades competitivas das empresas.
No eido da formación e da divulgación está previsto colaborar en mestrados e outros estudos de posgrao, programas de formación permanente, patrocinio de bolsas predoutorais e posdoutorais, premios a proxectos de fin de grao ou mestrado, traballos e concursos de ideas, conferencias, seminarios, obradoiros, promoción de prácticas curriculares e extracurriculares, visitas a empresas, plans de formación de empresas e institucións, formación para a creación de empresas de base tecnolóxica
etc.
E no terreo da investigación potenciaranse liñas conxuntas de traballo para desenvolver proxectos a nivel galego, español e europeo, apoiaranse teses de doutoramento e outras de fin de grao, promoveranse encontros nacionais e internacionais de expertos nas áreas de interese da Ciberseguridade, ademais de empurrar a contratación de grupos das universidades da Coruña e de Vigo para accións de innovación ou consultoría especializada na empresa.
Enxeñaría, informática e comisión de seguimento
A Escola de Enxeñaría de Telecomunicación da Universidade de Vigo e máis a Facultade de Informática da Universidade da Coruña poñerán a disposición da Cátedra R as súas instalacións para desenvolver todas estas actividades. Unha comisión de seguimento encargarase de supervisar as accións derivadas do convenio asinado polas universidades e máis R para aprobar as accións que se vaian desenvolver, aprobar os orzamentos anuais en virtude da achega económica anual de R e elaborar unha Memoria anual da Cátedra R en Ciberseguridade
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
