jueves, 17 de julio de 2025
Un camiño de luz inspirado nun ceo cargado de estrelas e constelacións que guiará os visitantes desde a Biblioteca e o Centro de Emprendemento ata o museo. A directora xerente da Fundación Cidade da Cultura, Ana Isabel Vázquez Reboredo, convidou os asistentes á feira en Pontevedra a achegarse ese día ao Gaiás e gozar dunha programación aberta a toda a cidadanía e pensada para vivirse en familia.
No interior do museo, un escenario recreará con rúas, prazas e casas unha vila inspirada nos nadais de diferentes épocas, onde os máis pequenos da casa aprenderán a facer adornos con materiais accesibles e naturais. Estes obradoiros están pensados para alimentar a súa creatividade, fomentando o emprego de decoracións artesanais e únicas coas que engalanar os seus fogares e a árbore da Cidade do Nadal. A cativada que se achegou ao Culturgal o sábado pola mañá puido probar xa a crear afeites con froitas propias do outono e do inverno.
Na Cidade do Nadal haberá, ademais, talleres de ilustración nos que os nenos e nenas traballarán a cor sobre un debuxo do artista vigués Federico Fernández. A través desta viaxe ilustrada, que irá medrando co paso dos días, percorreremos o Nadal ao redor do mundo. Unha exposición fotográfica sobre as festas da luz servirá tamén para coñecer como celebran estas datas noutras culturas afastadas e achegadas á vez.
A programación da Cidade do Nadal complétase co tradicional concurso infantil de postais, dirixido a cativos e cativas ata os 9 anos, e cun espectáculo para recibir o novo ano o día 3 de xaneiro na Cidade da Cultura, que será anunciado proximamente.
O cinema miúdo regresa ao Gaiás
No mes de xaneiro a programación continúa cunha nova edición de Pequefilmes, o festival de cinema que traerá ao Gaiás as mellores producións internacionais pensadas para o público máis miúdo. Pequefilmes celebrarase na fin de semana do 26 e 27 de xaneiro e contará con traballos seleccionados nos principais festivais de cinema infantil, xuvenil e de animación, ademais dunha escola de cinema onde as familias poderán aprender técnicas e conceptos do audiovisual para divertirse creando xuntas pequenas películas.
Os nenos e nenas serán espectadores e xuíces neste festival, xa que a súa ollada crítica terase en conta á hora de conceder os premios ás mellores curtas exhibidas. Aquelas que foron premiadas na pasada edición de Pequefilmes puidéronse ver esta mañá no espazo audiovisual do Culturgal.
Exposicións, teatro e emprendemento
As novidades da programación cultural do Gaiás para os próximos meses inclúen tamén a quinta edición de Escenas do Cambio, o festival de inverno de teatro, danza e arte en acción, que decorrerá entre os días 7 e 16 de febreiro e a exposición Pensar coas mans. Cestería, cerámica e xoiería de Galicia, unha mostra que mestura a forza creativa da artesanía galega coa vangarda máis actual e que abrirá as súas portas no mes de marzo.
O Culturgal foi tamén ocasión para coñecer os apoios que está a ofrecer a Cidade da Cultura aos novos emprendedores e emprendedoras galegos, e en especial os Premios Emprende Gaiás-Sixto Seco, que finalizaron a súa sexta convocatoria en novembro. Inés Rodríguez, co-fundadora de Kandoro (Premio Sixto Seco 2017), e Sabela Vilas, creadora de Boina Galega (Premio Sixto Seco 2018), contaron en primeira persoa o que supón este galardón para impulsar os seus proxectos.
O Goberno galego incrementará o orzamento destinado á formación do persoal dos servizos de prevención de incendios forestais ata os 1,8 millóns de euros no bienio 2025-2026, o que supón un 19% máis que no período anterior. Esta medida enmárcase no Plan de Prevención e Defensa contra os Incendios Forestais de Galicia (Pladiga), cuxo obxectivo é minimizar o impacto ecolóxico, económico e social dos lumes, optimizando os recursos dispoñibles. O compromiso formativo da Consellería do Medio Rural xa se reflectiu en 2024, cando se impartiron 473 cursos con 11.447 participantes e máis de 108.000 horas de adestramento. Entre 2019 e 2024 investiuse un total de 2,6 millóns de euros, permitindo a realización de 159 accións formativas e case 469.000 horas lectivas.
O 58% dos 855 ciclos de Formación Profesional ofertados para o próximo curso en Galicia complétanse na primeira adxudicación de prazas pechada onte pola Consellería de Educación, Ciencia, Universidades e FP, e que dá dereito a matricula. Segundo os datos recabados, un total de 56.049 persoas presentaron solicitude para cursar algunha modalidade de Formación Profesional, o que representa un incremento do 3,5% (1.898 solicitudes máis) con respecto ao curso 2024-25, e supón acadar de novo un máximo histórico que confirma o interese que espertan estas ensinanzas.
