domingo, 21 de diciembre de 2025
O presidente do Goberno galego, Alberto Núñez Feijóo, avanzou hoxe unha mobilización de máis de 20 millóns de euros para apoiar nove unidades mixtas nas cales centros de coñecemento e empresas colaboran para impulsar a I+D+i en sectores estratéxicos. Así, subliñou, Galicia acada, desde o inicio do programa, as 39 unidades mixtas -31 de nova creación e 8 de consolidación-; a mobilización de 114 millóns de euros grazas a axudas da Axencia Galega de Innovación por máis de 34 millóns; e a creación ou consolidación de 580 empregos cualificados.
Coñecemos hoxe a resolución da quinta edición do Programa de unidades mixtas de investigación e volvemos constatar que Galicia segue atraendo a innovación, dixo, precisando que con esta nova edición se apoiará a creación de cinco novas unidades e a consolidación doutras catro, creadas en 2015, en sectores estratéxicos da economía galega como a automoción, o naval, o aeronáutico, o biotecnolóxico, o forestal e o metalúrxico.
Logo de precisar que estas nove unidades contribuirán á creación ou mantemento de 133 postos de traballo de alta cualificación, o responsable do Executivo autonómico salientou que as cinco unidades mixtas de nova creación concentran a súa investigación nos sectores: aeronáutico, naval, forestal, automoción e de materiais.
Na primeira destas cinco unidades mixtas colaborarán Navantia e Aimen, que buscarán novos materiais e sistemas automatizados para a fabricación avanzada. Na segunda, Everis e o Instituto Tecnolóxico de Galicia cooperarán na xestión do tráfico aeroportuario. Na terceira, Finsa e a Universidade de Santiago de Compostela innovarán no desenvolvemento de modelos de economía circular vinculada ao sector forestal. Na cuarta, o Centro Tecnolóxico da Automoción de Galicia e o Grupo Antolín avanzarán nunha nova xeración de interiores de vehículos ante os futuros retos da mobilidade. E na quinta, o centro tecnolóxico Aimen e ArcelorMittal desenvolverán tecnoloxías facilitadoras para a fabricación de produtos de aceiro.
Ademais, tamén se conceden axudas para a consolidación de iniciativas xa en marcha grazas a este programa, nas cales colaboran Cetaqua Galicia e Viaqua, coa creación do Centro de innovación galego de sistemas avanzados de tratamento de auga (CIGAT); Navantia e a Universidade da Coruña, que traballan no estaleiro 4.0; CTAG e Viza Automoción, que avanzan no desenvolvemento da fábrica intelixente; e a Fundación Instituto de Investigación Sanitaria de Santiago de Compostela xunto con Roche Farma, que traballan na oncoloxía de precisión.
Finalmente, concluíu subliñando que neste programa traballan, de forma conxunta e coordinada, un total de 28 multinacionais líderes nos seus respectivos sectores e 13 centros de coñecemento galegos.
O programa Radio na Biblio, que vai polo noveno ano en funcionamento, chega este curso a 245 centros de ensino que contan cun laboratorio de radio no que traballan as competencias vencelladas á alfabetización mediática, lingüísticas ou de expresión escrita e oral, entre outros. Con nove cursos en marcha, trátase dun programa consolidado que aproveita a posta en marcha dunha emisora de radio na biblioteca para traballar habilidades e destrezas e que permite o tratamento de contidos curriculares mediante metodoloxías activas e innovadoras que facilitan a aprendizaxe. Ademais, as actuais tecnoloxías da información e da comunicación facilitan o uso da radio como ferramenta pedagóxica de gran alcance para a difusión dos proxectos e iniciativas do centro educativo.
Tivo lugar a na cerimonia de entrega dos XVIII Premios Nacionais de Artesanía 2025, na que resultaron premiadas dúas candidaturas galegas. O artesán Aitor Martínez López de Arbina (Tomiño), especializado en tornería de madeira, resultou gañador na categoría Produto e a Fundación Artesanía de Galicia obtivo o recoñecemento na categoría Promociona para Entidades Públicas polo seu proxecto 'Artesanía no Prato'.
