miércoles, 9 de julio de 2025
Os 10 festivais de verán asociados este ano á marca FEST Galicia congregaron preto de 200.000 asistentes, que foron así mesmo os receptores das diferentes actividades de promoción e concienciación desenvolvidas baixo esta iniciativa da Xunta para promover o territorio galego como destino musical seguindo criterios de calidade, sostibilidade e responsabilidade social.
PortAmérica, Resurrection Fest, Atlantic Fest, Vive Nigrán, Sinsal SON Estrella Galicia, 17º Ribeira Sacra, SonRías Baixas, Revenidas, Festival de la Luz e WOS Festival son os 10 eventos asociados a esta primeira temporada de FEST Galicia, que naceu como un proxecto transversal do Goberno autonómico e reforza o apoio que xa se lles estaba brindado aos festivais mediante a convocatoria anual de subvencións. Na que foi a súa experiencia piloto, a marca tivo presenza neles mediante diferentes accións coordinadas pola Consellería de Cultura e Turismo, a través da Axencia Galega das Industrias Culturais (Agadic), en colaboración directa coa Consellería de Medio Ambiente, Territorio e Vivenda, a Secretaria Xeral da Igualdade, a Secretaría Xeral de Política Lingüística e a Dirección Xeral de Xuventude, Participación e Voluntariado.
Materiais reciclados
Un stand versátil, cun deseño inspirado nas estruturas dos propios escenarios dos festivais e para o que se empregaron materiais reciclados, centralizou esta actividade na meirande parte dos casos, sumando 130 horas de atención e información ao público. Ademais, a marca difundiuse brindándolles a súa imaxe a varios escenarios, mesas de debate e outras actividades culturais paralelas.
Ao tempo que se apoiou a programación musical con perspectiva de xénero e a incorporación de mulleres a todas as categorías profesionais da organización destes encontros, FEST Galicia contou coa implicación da Secretaría Xeral de Igualdade no marco na campaña AgresiónOff: Eu digo non á violencia sexual. Neste sentido, varios dos festivais dispuxeron de persoas de seguridade identificadas con chalecos de cor violeta e de persoal especializado para informar sobre como actuar en caso de agresións. Difundiuse con este fin un decálogo contra a violencia sexual, en liña cunha nova aplicación móbil desenvolvida pola Xunta, ademais de promover o lema da campaña mediante propostas lúdicas, como os obradoiros de estampaxe de camisetas.
Lingua e mocidade
O espazo FEST Galicia acolleu tamén a iniciativa O galego crea ambiente, ideada pola Secretaría Xeral de Política Lingüística para promover o valor da lingua galega como parte do noso patrimonio, xunto coa cultura e o medio natural. Esta dobre mensaxe transmitiuse co obxectivo de convidar a mozos e mozas a relacionarse de xeito responsable co medio e a facelo en galego. Nun ambiente lúdico, convidouse os asistentes a participar en probas de improvisación e coñecemento do galego, así como a achegar as súas ideas sobre como promover a nosa lingua entre a xente nova de cara á elaboración do primeiro Plan de Dinamización da Lingua Galega entre a Mocidade.
A este público mozo dirixíronse, así mesmo, varias iniciativas de promoción do Carné Xove e de difusión dos programas que ten en marcha a Dirección Xeral de Xuventude, Participación e Voluntariado.
No caso da Consellería de Medio Ambiente, Territorio e Vivenda, entre outras, desenvolvéronse accións divulgativas por parte de monitores con formación específica, que incidiron na importancia de contribuír á sustentabilidade ambiental deste tipo de eventos. Neste sentido, púxose á disposición do público asistente diversas tipoloxías de contedores para garantir unha recollida e xestión axeitadas dos residuos que se xeraron.
Industria cultural
A posta en marcha de FEST Galicia reflectiuse tamén no apartado das industrias culturais, ámbito no que a Agadic, en colaboración coa Universidade de Santiago, promoveu a elaboración de estudos dos impacto económico e social de cinco dos festivais: PortAmérica, Resurrection Fest, Sinsal, SonRías Baixas e Revenidas. Os seus informes, xa presentados, están a ser o punto de partida para o deseño de novas medidas que redunden nos valores que FEST Galicia promove, como é o caso da redacción dun manual de boas prácticas para estes eventos, que se está a elaborar en colaboración coa Asociación Empresarial Festivais de Galicia.
En estreita relación con esta medida, a medio prazo desenvolverase un selo distintivo que recoñeza e lles dea visibilidade aos festivais profesionais organizados con criterios de calidade, sustentabilidade e responsabilidade social, fixando así mesmo os requisitos que deberán reunir os eventos FEST Galicia nas próximas convocatorias públicas de adhesión. Igualmente, será de moita utilidade no inicio dos traballos cara á elaboración dun plan estratéxico para este sector, de novo en colaboración directa cos seus representantes.
O Festival Abanea celebrará entre o 16 e o 20 de xullo a súa cuarta edición cun programa de danza contemporánea de distintos estilos que distribuirá 15 funcións de nove compañías entre os concellos de Ames, Outes, Marín, Foz e Celanova. ISMO Cultura, colectivo organizador do encontro, estenderá así a súa actividade de exhibición e dinamización ás catro provincias. A bailarina Andrea Castro presentou a primeira fase do espectáculo Lola y los lamentos, como artista seleccionada para o acompañamento bienal 20252026 co que o festival apoia procesos de creación de artistas emerxentes e que nesta edición terá como resultado a estrea de 'A mona de seda'.
As diversas actividades do festival terán lugar do 28 de xullo ao 1 de agosto no claustro do Mosteiro de San Salvador de Celanova. A actuación que inaugurará a cita será a da Banda de Música de Celanova con James Morrison, un concerto único en España que terá lugar ás 20,30 horas. Ademais deste, subirán ao escenario a Boston Brass de Estados Unidos, Abraham Cupeiro coa Orquestra Gaos e pechará a edición o Hércules Brass Ensemble dirixido por Isabel Rubio e coa Boston Brass e Adam rapa como solistas. Así, os concertos complementaranse con cinco días de actividades formativas para un centenar de estudantes procedentes de distintas comunidades autónomas. Clases de alto nivel da man dalgúns dos participantes nas actuacións e un seguimento continuo e individualizado que garante un acompañamento pedagóxico para o alumnado que xa leva participado en varias edicións consecutivas do festival.
