domingo, 4 de mayo de 2025
Nota de prensa del Gabinete de Comunicación del Concello de Santiago de Compostela:
O alcalde de Santiago confirmou que xa foi presentada no Xulgado de Primeira Instancia de Madrid a demanda civil contra Carmen Franco, para esixir a devolución ao Concello das figuras de Abraham e Isaac, obras do Mestre Mateo que están en posesión da familia Franco. Martiño Noriega detallou que a acción xurídica foi interposta a través dun poder notarial, e sinalou que "a asesoría xurídica municipal estima que o máis probable é que a sentenza se demore polo prazo dun ano".
O alcalde insistiu en que a demanda presentada polo Concello "engade toda a documentación que demostra que o Concello é o lexítimo propietario das dúas pezas, ao tempo que incorpora informes de expertos de prestixio tanto no relativo á identificación das figuras como ao contexto no que pasaron a mans do ditador".
Ademais, Martiño Noriega incidiu en que "na demanda afrontamos xa a posibilidade de que a familia Franco alegue a prescrición para quedar coas figuras, argumentando que as pezas forman parte do patrimonio público e polo tanto nin poden ser cedidas nin agasalladas nin hai lugar á prescrición". De feito, o alcalde insistiu en que "así aparece recollido non só na actual lei, senón tamén nunha lei da República que non se chegou a derogar durante a ditadura franquista"
O rexedor recoñeceu que o Goberno non descarta "incorporar á demanda a petición dalgunha medida cautelar, tendo en conta que as figuras de Abraham e Isaac forman parte dunha exposición que se poderá ver ata o mes de febreiro no Pazo de Xelmírez". Segundo Martiño Noriega, "esa decisión tamén estará condicionada pola posibilidade de que esa mostra viaxe a outras cidades do mundo para exhibir a obra do Mestre Mateo".
O alcalde valorou especialmente que a presentación da demanda chega precedida por un amplo consenso sobre a necesidade de recuperar as pezas, "unha unidade que se demostrou no Pleno do Concello de Santiago, no Parlamento Galego e no Congreso dos Deputados". Para Martiño Noriega, "esta unidade avala que o Concello afronte por primeira vez en 30 anos a vía xudicial como única vía posible para recuperar as pezas do Mestre Mateo".
A obra Hombre y joven marinero (1929), do poeta e artista Federico García Lorca e pertencente á colección da Fundación Pública Galega Camilo José Cela, formará parte da exposición internacional The First Homosexuals, que se inaugurará o 2 de maio no prestixioso espazo Wrightwood 659 de Chicago. Trátase dunha mostra que reúne máis de 250 obras que documentan as primeiras representacións artísticas da homosexualidade no panorama internacional posterior a 1869. A Fundación Camilo José Cela continúa así co seu labor de conservación, difusión e proxección internacional do seu valioso fondo artístico e documental, favorecendo o diálogo cultural arredor dunha das figuras máis senlleiras da literatura e da arte do século XX.
A figura e o legado de Alfonso Daniel Rodríguez Castelao será divulgada a través dunha decena de publicacións ao longo deste 2025, dentro das accións da programación do Ano Castelo, co que o Goberno galego conmemora o 75 aniversario dunha das figuras máis senlleiras de Galicia. Entre elas estarán 'Celebrando a Castelao. O artista polifacético', de Rubén de Lis, dúas edicións da emblemática obra teatral 'Os vellos non deben de namorarse', os discursos institucionais de Castelao (da man da Fundación Castelao) ou a dixitalización da documentación sobre o Estatuto de 1936 (en colaboración co Instituto Padre Sarmiento).
