domingo, 4 de mayo de 2025
Nota de prensa del Gabinete de Comunicación del PPdeG:
O Parlamento de Galicia aprobou a proposición non de lei impulsada polo Grupo Popular a través da que se insta á Xunta a intensificar a colaboración cas entidades locais que integran a rede de concellos en contra da violencia de xénero, de cara a conseguir unha maior efectividade dos recursos e procurar desenvolver conxuntamente accións no ámbito da sensibilización e a prevención; da información sobre os recursos e servizos existentes; da formación, tanto de profesionais como de persoal político; e da asistencia ás vítimas.
A portavoz de Igualdade, Marián García Míguez, situou o traballo conxunto como pulso contra a violencia de xénero, e de aí esta proposición non de lei dirixida a intensificar a colaboración coas entidades locais que integran a rede de concellos contra a violencia machista. Neste sentido, lamentou que En Marea, PSdeG e BNG rexeitaran apoiar esta proposta en positivo, co único obxectivo de amosarlle á sociedade galega que estamos todos os grupos parlamentarios apoiando ás vítimas de violencia de xénero.
García Míguez explicou que as mesas locais de coordinación institucional contra a violencia de xénero son un instrumento operativo onde están representados todos os ámbitos municipais implicados, directa ou indirectamente, na loita contra a violencia de xénero.
Os seus obxectivos son moi concretos: a detección precoz dos casos; optimizar a coordinación dos axentes implicados; ofrecerlles unha atención e unha resposta áxil ás vítimas; mellorar a protección nos casos que presenten alto risco; e informar e sensibilizar na materia tanto a profesionais como á sociedade, concretou.
Na actualidade, a rede galega de entidades locais contra a violencia de xénero conta con máis de 178 concellos adheridos, dos que 67 teñen constituída a mesa local de coordinación.
Por outra banda, o Grupo Popular tamén apoiou no Pleno a aprobación dunha proposición non de lei do Grupo Socialista a través da que se solicita ao Goberno central que cumpra e axilice na medida do posible os prazos establecidos para a implantación do Pacto de Estado contra a violencia de xénero, ao tempo que poña en funcionamento as medidas adoptadas, especialmente aquelas que teñen que ver coas entidades locais e o papel que lles corresponde no ámbito da atención e protección das mulleres vítimas, as súas fillas e fillos.
Nesta proposición non de lei tamén se incorpora a solicitude ao Goberno central para que de maneira urxente active e traslade as partidas orzamentarias acordadas para a execución dos acordos do Pacto de Estado ao conxunto das administracións implicadas: comunidades e cidades autónomas, deputacións provinciais, cabidos insulares e concellos.
Nota de prensa del Gabinete de Comunicación del PSdeG:
O Pleno do Parlamento aprobou a proposición non de Lei do Grupo Socialista, para reivindicar o cumprimento coas medidas previstas no Pacto de Estado contra a Violencia de Xénero. A portavoz de Igualdade, María Pierres, presentou esta proposta para, dixo, facer o comprometido, e facelo canto antes, como instrumento complementario á lexislación e coa correspondente dotación orzamentaria.
A proposta pide a posta en marcha das medidas adoptadas no dito Pacto de Estado. Sinala así especialmente aquelas que teñen que ver coas entidades locais e o papel que lles corresponde no ámbito da atención e protección das mulleres vítimas e as súas fillas e fillos, e reclama as partidas orzamentarias acordadas para o seu cumprimento.
Pierres chamou hoxe a facer que o que é un problema de Estado, que conlevou un Pacto de Estado, non sexa agora un fracaso de Estado, e lembrou que se trata dun problema que afecta a todos e a todas.
Advertiu que os métodos de protección das vítimas son insuficientes e ineficaces como demostra que se fracase na orde de protección dunha muller que solicita amparo e axuda, e que ese fracaso se materialice co seu asasinato. Preguntou como vamos trasladar a mensaxe de que é preciso denunciar se un 20 por cento das mulleres asasinadas en 2016 denunciaran previamente, e un 11,4 tiñan unha orde de protección en vigor.
A deputada socialista lembrou que a día de hoxe, oficialmente son 44 as vítimas de violencia de xénero, as mesmas que en todo 2016 e que agochan un dato absolutamente demoledor e desalentador. Aludiu a que no que vai de ano teñen sido asasinados oito menores a mans dos seus pais -un deles galego-, por un asasinado en 2016.
Sinalou que os equipos de forzas de seguridade que atenden ás vítimas con protección son insuficientes e incapaces de asegurar esa vixilancia de agresor e velar pola seguridade das vítimas. Ese é o caso, dixo, no que podemos entender mellor a importancia de investir, e de facelo de urxencia e o mesmo, engadiu, hai que trasladalo á prevención, á formación e á especialización dos axentes do proceso de atención ás vítimas.
Texto da iniciativa aprobada:
-O Parlamento galego insta á Xunta de Galicia a solicitar do Goberno do Estado:
1.- Que se cumpran e axilicen na medida do posible os prazos establecidos, dado que o pacto de estado contra a violencia de xénero significa loitar contra un gravísimo asunto que afecta á seguridade das mulleres como cidadás.
2.- Que poña en funcionamento as medidas adoptadas no pacto de estado contra a violencia de xénero, especialmente aquelas medidas que teñen que ver coas entidades locais e o papel que lles corresponde no ámbito da atención e protección das mulleres vítimas, as súas fillas e fillos.
3.- Que de maneira urxente active e traslade as partidas orzamentarias acordadas para a execución dos acordos do pacto, ao conxunto das administracións implicadas: comunidades e cidades autónomas, deputacións provinciais, cabildos insulares e concellos.
4.- Dar traslado desta proposición e a súa aprobación ao presidente do Goberno, á ministra de Sanidade, Servizos Sociais e Igualdade, así como ao conxunto de ministerios implicados.
Fotografía: Gabinete de Comunicación del PSdeG
A obra Hombre y joven marinero (1929), do poeta e artista Federico García Lorca e pertencente á colección da Fundación Pública Galega Camilo José Cela, formará parte da exposición internacional The First Homosexuals, que se inaugurará o 2 de maio no prestixioso espazo Wrightwood 659 de Chicago. Trátase dunha mostra que reúne máis de 250 obras que documentan as primeiras representacións artísticas da homosexualidade no panorama internacional posterior a 1869. A Fundación Camilo José Cela continúa así co seu labor de conservación, difusión e proxección internacional do seu valioso fondo artístico e documental, favorecendo o diálogo cultural arredor dunha das figuras máis senlleiras da literatura e da arte do século XX.
A figura e o legado de Alfonso Daniel Rodríguez Castelao será divulgada a través dunha decena de publicacións ao longo deste 2025, dentro das accións da programación do Ano Castelo, co que o Goberno galego conmemora o 75 aniversario dunha das figuras máis senlleiras de Galicia. Entre elas estarán 'Celebrando a Castelao. O artista polifacético', de Rubén de Lis, dúas edicións da emblemática obra teatral 'Os vellos non deben de namorarse', os discursos institucionais de Castelao (da man da Fundación Castelao) ou a dixitalización da documentación sobre o Estatuto de 1936 (en colaboración co Instituto Padre Sarmiento).
