jueves, 18 de abril de 2024
Nota de prensa del Gabinete de Comunicación del PPdeG:
O Parlamento de Galicia aprobou a proposición non de lei do Grupo Popular, coa abstención de todos os grupos da oposición, a través da que se demanda á Xunta que realice un estudo xurídico, en colaboración coas universidades galegas, que analice a posibilidade e mecanismos que, respectando a legalidade vixente, permitan incorporar ao patrimonio público a propiedade das Torres de Meirás, sen que isto implique un novo custo para o pobo de Galicia, que xa o asumiu no ano 1938.
O portavoz do Grupo Popular, Pedro Puy, subliñou que o obxectivo principal é a recuperación para o patrimonio público do Pazo de Meirás a través dunha documentación xurídica que probe e determine como levar adiante este proceso. Por este motivo, avogamos por que este informe sexa elaborado por unha comisión de expertos o máis plural e técnica posible, que estableza xuridicamente os pasos a seguir, incluíndo a posible modificación das leis cumprindo sempre coa lexislación vixente.
Puy lamentou que a intransixencia dos socialistas privara da aprobación por unanimidade dun acordo para a creación desta comisión de expertos que estude as posibilidades de incorporar o Pazo de Meirás ao patrimonio público. En primeiro lugar, o portavoz popular chegou a propoñer a retirada da súa proposición de lei para votar unicamente a proposición socialista e, unha vez que os socialistas incorporaron as emendas de En Marea e BNG á súa proposición de lei, tamén se negaron a que se votara por puntos esta iniciativa.
Deste xeito, finalmente aprobouse a proposición non de lei do Grupo Popular, sen ningún voto en contra por parte da oposición. Da división amosada hoxe no Parlamento, auspiciada polo Grupo Socialista, os únicos que poden sacar proveito son os propietarios do Pazo de Meirás, indicou Pedro Puy.
Nota de prensa del Gabinete de Comunicación del PSdeG:
A portavoz de Cultura do Grupo Socialista, Concepción Burgo, reclamou a reversión da propiedade do Pazo de Meirás á titularidade pública como forma de rematar xa coa anomalía democrática. O PP rexeitou esta proposta socialista transaccionada co resto dos grupos para pedir tamén a ilegalización da Fundación Franco, que actualmente xestiona as visitas ao BIC.
A responsable socialista urxiu a recuperar este ben, nunha situación agravada polos incumprimentos da familia Franco á hora de permitir unhas visitas ao inmoble xestionadas pola Fundación Franco mentres fai apoloxía do Franquismo. Advertiu que se trata dun botín de guerra adquirido polo ditador en plena Guerra Civil deixando probas documentais múltiples de que se trata dunha propiedade ilexítima.
Os socialistas reclamaban a constitución dunha comisión técnica especial coa participación de Xunta, Deputación de Coruña e os concellos de Sada e A Coruña, garantindo pluralidade institucional e política para dirixir o traballo de expertos en historia e dereito para abrir vías á recuperación do inmoble. Explicou que esta Comisión podería suxerir as reformas legais necesarias para garantir a recuperación do ben.
Burgo explicou que se trata dunha inxustiza histórica que non pode manterse e puxo como exemplo países que viviron períodos dirixidos por ditadores, e sinaladamente o caso de Alemaña, que atopou a maneira de devolverlle aos xudeus as propiedades usurpadas polo nazismo.
Os socialistas reivindicaron unha fórmula que inclúa a todos, e por iso aceptaron as emendas presentadas polo resto de grupos da oposición, que sen embargo foron rexeitada polo PP. Finalmente foi aprobada unha iniciativa insuficiente do PP que non contemplaba nin a constitución da dita Comisión nin a posibilidade de abrir vías para a reforma legal, e que contou por iso coa abstención do PSdeG.
Nota de prensa del Gabinete de Comunicación del BNG:
O deputado do BNG, Luís Bará criticou que o Partido popular defenda crear unha comisión sobre o Pazo de Meirás cando xa existe unha iniciativa impulsada pola Deputación da Coruña, concellos e asociacións para a recuperación da memoria histórica traballando para a devolución do Pazo e dos bens espoliados ao pobo galego polo que pediu á Xunta de Galiza apoiar e sumarse a esta iniciativa. Hoxe, dixo o nacionalista, estamos a falar da devolución do Pazo de Meirás despois de 80 anos do seu roubo e 42 anos da morte do ditador e preguntou como é posible que bens roubados sigan en mans da familia Franco. Estamos, ante unha anomalía histórica e unha vergoña democrática que pon en evidencia as complicidades co franquismo, complicidades que tamén existiron durante a Transición e diso sabe moito o Partido popular, 7 fundadores de Alianza Popular foron ministros do franquismo.
Meirás, afirmou o deputado do BNG, é o símbolo da impunidade que segue desfrutando a familia do caudillo ao que sumou os títulos nobiliarios do Señorío de Meirás e Ducado de Franco, unha vergoña para unha democracia. Hai que coñecer a verdade dun espolio, dun roubo perpetrado por un réxime ilegal, saído dun golpe de Estado e o espolio dunha organización corrupta que foi a que roubou Meirás e os bens ao pobo galego. Agora, explicou Bará, o Partido popular fai unha proposta limitada e con moitos erros e inexactitudes como manobra para acalar o clamor social a favor da devolución dos bens roubados. Vostedes, dixo, dirixíndose ás bancadas populares, negáronse a tramitar a declaración BIC do Pazo de Meirás e mesmo Feijóo chegou a declarar que non era un Pazo, que eran só unhas torres.
O PP rexeitou sistematicamente todas as iniciativas para a devolución de Meirás e demostrou a súa complicidade coa familia e Fundación Franco mesmo regalándolle 53.000 de subvención para abrir o pazo. Agora, reiterou veñen cunha iniciativa de boicot e contra programación á iniciativa tomada pola Deputación da Coruña xunto outras institucións e concellos para crear unha xunta pro-devolución do Pazo .
O deputado volveu pedir que o Parlamento formulara unha condena da Fundación Franco. Que o Partido popular condene as declaracións de apoloxía do franquismo e evite que o guía das visitas ao pazo de Meirás sexa un policía represor. Bará volveu pedir a ilegalización da Fundación Franco por apoloxía do xenocidio e do franquismo.
O obxectivo, remarcou, é recuperar Meirás e todos os bens espoliados e ademais, expulsar o franquismo de Galiza e da democracia. O goberno galego debe sumarse a iniciativa impulsada pola Xunta pro devolución do Pazo de Meirás e non boicotear iniciativas que xa están en marcha. A proposición non de lei para crear a comisión saíu adiante só cos votos do grupo popular.
A Secretaría de Estado de Turismo vén de emitir a resolución pola que se concede a declaración de Interese Turístico Nacional á Festa da Filloa de Lestedo, en Boqueixón. Con este recoñecemento, Galicia suma xa 10 festividades con este recoñecemento. A Festa da Filloa de Lestedo súmase así ás outras nove que xa contan con este recoñecemento: a Romaría de Nosa Señora da Barca (Muxía), as Carrilanas de Esteiro (Muros), as festas do San Froilán (Lugo), a Feira do Bonito (Burela), a Festa da Historia (Ribadavia), o Entroido de Verín. Tamén a Festa do Marisco do Grove, as Festas de San Roque (Vilagarcía de Arousa) e a Festa da Reconquista (Vigo).
Baixo o título 'Horizontes dos Estudos Galegos e /na Lusofonía', esta nova edición do congreso da AIEG parte do tradicional vínculo entre Galicia e os países lusófonos para promover o debate, a crítica e novas propostas sobre as relacións no espazo cultural, académico e institucional. Farao a través de relatorios, paneis, mesas e sesións plenarias nas que participarán especialistas das tres universidades galegas, pero tamén do ámbito nacional e internacional, que discutirán sobre os campos lingüístico, literario, histórico, económico, antropolóxico, filosófico, sociolóxico e artístico. No marco do congreso tamén terán cabida as actividades culturais, como excursións ou exposicións, especialmente dirixidas á mocidade investigadora; ou a presentación de produtos académicos e proxectos, como o Proxecto Nós, impulsado polo Goberno galego para incorporar a lingua propia de Galicia á vangarda da Intelixencia Artificial.
