Noticias

Las fiestas de la Ascensión, de la capital de Galicia, comienzan con un concierto de Los 40

Nota de prensa del Gabinete de Comunicación del Concello de Santiago:

O alcalde presentou a programación das festas da Ascensión, que se celebrarán do 24 ao 28 de maio. Martiño Noriega explicou que o programa "reforzará as propostas máis tradicionais das que son as festas picheleiras por excelencia, ao tempo que incluirá novas actividades pensadas para todos os veciños e veciñas". Como principal novidade, o rexedor destacou o escenario que estará instalado na praza do Toural, polo que pasarán grupos do censo Compostela É! Música, posto en marcha hai uns meses.
Os principais concertos da Ascensión terán lugar no escenario da praza da Quintana, todos eles de balde. Por el pasará, no día grande das festas, o xoves 25, Myles Sanko, un cantante de Ghana afincado no Reino Unido que con tres discos no mercado é xa un referente no soul actual. A súa actuación estará precedida pola de Eladio y los Seres Queridos, que veñen de gañar o premio ao Mellor Álbum en Galego nos galardóns MIN.

O día 27, será a vez de Kiko Veneno, nun concerto que arrancará coa actuación do trío liderado por Marcos Teira, Translatios Trío, co pianista Alejandro Vargas e o bailarín Isaías Montero como invitados.

As propostas da praza da Quintana completaranse co Concerto dos 40 o primeiro día das festas, o mércores 24, que xuntará a Miss Cafeína, Luis Brea y el Miedo e Shinova. O venres 26 será o día reservado para a Real Filharmonía de Galicia, dirixida por Jonathan Webb, e o domingo 28 será a xornada para os nenos e as nenas, cun concerto con María Fumaça e a Pequena Grande Orquestra.

O alcalde salientou que todos os concertos serán de balde, "porque queremos que a Ascensión sexa unha festa para toda a veciñanza, sen trabas, e aínda que iso supoña ter que poñer máis limitacións á hora de deseñar a programación".

O alcalde salientou a aposta do Goberno "pola música feita aquí", e o interese en darlles aos grupos composteláns a oportunidade de actuar nas festas da cidade. De aí a novidade desta programación: a instalación dun escenario específico na praza do Toural que "estará a disposición dos músicos da cidade que forman parte do censo que se puxo en marcha hai uns meses". Por ese escenario pasarán Carla Green & The Demons, Cachas & Cousins, Roberto Sobrado Grupo e Gergelyes.

Ademais, mantéñense citas musicais consolidadas como o Folc na Rúa, coa participación das agrupacións tradicionais Brincadeira, Cantigas e Agarimos, Colexiata de Sar e Ultreia o xoves 25; e as Corais na Rúa, coa participación de oito agrupacións o sábado 27. Tamén actuarán a Banda Municipal de Música de Santiago os días 25 e 28, e a Banda de Lalín, o día 27.

Haberá igualmente dúas propostas vinculadas aos Orzamentos Participativos na área de Mocidade, cunha festa no Toural o xoves 25 na que participarán Trópico de Grelos e Brinkadelia Troupe; e co Cancelas Fest, o venres 26.

Na programación da Ascensión 2017 non faltan as citas máis tradicionais destas festas, como a Feira Cabalar que se celebrará en Amio o xoves 25; as actuacións das orquestras na Alameda, o LXI Torneo da Chave das Festas da Ascensión, ou a XX Festa dos Maiores, o sábado 27. O alcalde salientou que as entradas estarán á venda a partir do 15 de maio no Teatro Principal en horario de mañá, mantendo o seu prezo nos sete euros dos dous anos anteriores.

O cartel das festas da Ascensión deste ano é obra de Jano Viñuela, un artista que forma parte da MIIC, Mostra Internacional de Ilustración que se pode ver no Auditorio de Galicia ata o 25 de xuño.