jueves, 9 de abril de 2026
Nota de prensa del Gabinete de Comunicación del BNG:
O BNG presentou a campaña que desenvolverá por todo o país con motivo da celebración do 25N baixo o lema 365 Días contra todas as violencias: visibilizar, denunciar, erradicar e, por boca da portavoz nacional, Ana Pontón, propón un acordo galego contra a violencia machista que inclúa a todas as forzas políticas e aos colectivos sociais que loitan contra esta lacra.
E pon sobre a mesa unha medida de aplicación inmediata nos orzamentos de 2017: destinar o 1% das contas públicas a financiar políticas de igualdade e de loita contra a violencia de xénero, o que suporía pasar dos 11 millóns de euros actuais a un mínimo de 90 millóns de euros.
Se realmente temos un goberno comprometido nesta loita ten que plasmarse nos orzamentos, salientou a responsable de Acción feminista e deputada Noa Presas, porque hoxe os gastos de mantemento da Cidade da Cultura son superiores ao que se destina a igualdade e protección das mulleres. Presas subliñou a importancia do papel dos concellos e avogou pola actualización de protocolos a través da Fegamp.
Segundo a ONU, o 70% das mulleres sofren algún tipo de violencia de xénero ao longo da súa vida e só en Europa en 2015, 25 millóns de mulleres foron vítimas de algún tipo de agresión.
A portavoz nacionalista fai un chamamento a considerar esta cuestión como prioridade política, -desde o BNG tendemos a man para situar nun primeiro plano este problema social-, e admitir que non se está a facer o suficiente para erradicar a violencia de xénero.
Temos que ter a humildade e a coraxe de admitir que algo falla cando case a metade das asasinadas o pasado ano tiñan orden de denuncia, indicou, polo que as medidas xudiciais e policiais que activa unha denuncia non garante a vida das mulleres. Pontón insta a unha reflexión serena porque os medios son insuficientes e están fallando, o que nos obrigan a repensar o que se está facendo.
Dentro deste acordo galego contra a violencia de xénero, o BNG propón as seguintes cuestións clave.
En primeiro lugar, reformar a lexislación galega para incluír o termo feminicidio e desenvolver un estatuto de protección da vítima. Mellorar todos os dispositivos de atención, desde o aspecto psicolóxico ao laboral e en terceiro lugar fixar un calendario para dotar de xulgados específicos en 2017 polo menos a todas as cidades galegas.
Igualmente, establecer unha mesa sectorial do ensino para elaborar unha lei de co-educación ante a persistencia de actitudes machistas entre a xente moza. Ademais, urxe abordar a violencia económica que soportan as mulleres, ante a que propón excluír da contratación pública ás empresas que practiquen a discriminación salarial e elaborar un informe bianual da situación de xénero. E, en canto aos recursos públicos, adicar como mínimo o 1% dos orzamentos a políticas de igualdade.
Debe ser unha prioridade garantir á mulleres o dereito a vivir en liberdade. Non chega con poñerse un lazo rosa o 25N, sen recursos e sen vontade política é imposible cambiar nada, salientou Pontón, quen fixo un recoñecemento expreso do traballo do feminismo organizado.
A dirixente nacionalista considera que a violencia de xénero nunca foi unha prioridade para o goberno de Feijóo, e citou como exemplo que, aínda a día de hoxe, as vítimas teñan que compartir espazo con agresores na administración de xustiza.
Esta na lei pero non na realidade dos xulgados, onde as mulleres che din que é un horror sentarse nunha sala a agardar enfronte do seu agresor. Que non haxa esas salas diferenciadas é un problema de vontade política. Por iso, Pontón confía en que esta non sexa unha nova lexislatura perdida en materia de loita contra o terrorismo machista.
En Galiza, ademais da violencia extrema que deixou 8 asasinadas, o pasado ano producíronse máis de 5.000 denuncias, a punta do iceberg porque 7 de cada dez non presenta denuncia- No último informe da Xunta no que se recolle que o 25% das mulleres de entre 16-19 anos ve normal que a súa parella lle controle as relacións persoais ou o feito de que un terzo dos rapaces de entre 12 e 24 anos consideran ás vítimas responsables da agresión.
Fotografía: Gabinete de Comunicación del BNG
O Carballo Interplay desenvolverá do 16 ao 19 de abril no Mercado de Carballo a súa 13ª edición cun programa de 32 actividades arredor da creación dixital contemporánea, das series en pequeno formato, a cultura de internet e a reflexión sobre os novos modos de comunicar na rede. O certame reforza especialmente este ano a presenza do galego como lingua de creación, conversa e pensamento no ecosistema dixital, cunha programación específica arredor dos contidos no noso idioma nas redes sociais, accións formativas para a mocidade, premios dirixidos a recoñecer o talento que crea na nosa lingua e novas oportunidades para a produción de proxectos audiovisuais nados no ámbito dixital.
A Cidade da Cultura celebrará o Día do Circo o vindeiro 19 de abril co espectáculo 'Sen patrón', da compañía galega Pistacatro, recoñecida co Premio Nacional 2025 desta disciplina artística. A proposta terá lugar no Xardín do Teatro, ás 17,00 horas, con entrada libre e de balde. Así, o Día do Circo convértese nun momento para celebrar tamén a chegada da primavera cunha proposta escénica aberta, festiva e accesible para todo tipo de públicos, que combina cabaré, números aéreos e malabares cunha dramaturxia que reivindica tanto técnicas circenses tradicionais como contemporáneas. Pistacatro é unha das compañías e produtoras de circo máis relevantes das artes vivas de Galicia, que traballa a prol da profesionalización do circo na Comunidade, impulsando as carreiras de artistas e traballadores do sector.
