domingo, 8 de noviembre de 2026
Nota de prensa del Gabinete de CC.OO.-Galicia:
Sobre a lei de emprego, a sindicalista coida positivo que se regulen legalmente os instrumentos que a Administración autonómica ten na súa man, xa que posúe as competencias para as políticas neste ámbito. Maica Bouza defende que a norma se consensúe cos axentes sociais e xa avanza algunhas das peticións de CCOO: que a comunidade autónoma teña recursos de seu, que a lei dispoña dun orzamento propio e que se converta o Servizo Público de Emprego nun ente autónomo. Isto, xunto co regreso da Consellaría de Traballo ao organigrama da Xunta, un departamento específico que teña como único obxectivo a creación de emprego.
Doutra parte, Bouza xulga «incompatible» falar de orzamentos expansivos e, ao tempo, de redución de impostos. CCOO rexeita a rebaixa de impostos con carácter xeral e avoga, no seu lugar, por unha reforma fiscal progresiva e equitativa. «Que pague máis quen máis ten, non que se reduzan impostos que afectan por igual as persoas que dificilmente superan o limiar da pobreza e aos grandes especuladores», asevera Bouza.
Na súa intervención, Feijóo sinalou como unha das primeiras medidas a aprobación do teito de gasto e dos orzamentos, co que a Xunta logo podería ter «case 250 millóns de euros máis a disposición dos galegos». A secretaria de Emprego de CCOO de Galicia rexeita esta visión «excesivamente optimista», porque mentres non se modifique o actual marco legal, «o diñeiro adicional de que se dispoña hase destinar a pagar a débeda, non a mudar as concidións de vida dos galegos e das galegas».
CCOO defende que se modifique a lei que regula o teito de gasto das Administracións públicas e, tamén, que o Estado español lle recoñeza a Galicia «o que nos corresponde», tanto en financiamento automómico como nos instrumentos de reequilibrio territorial.
Canto ao resto de propostas, desde o sindicato cren que se trata dunha «declaración de intencións», polo que haberá que agardar para saber en que se concretan.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
