sábado, 24 de octubre de 2026
Nota de prensa del Gabinete de Comunicación de la Xunta de Galicia:
A cidade da Coruña celebra no mes de agosto a súa cuadraxésima quinta edición da feira do libro cun programa especial que inclúe, entre o día 1 e o 10, máis dun cento de actividades para a difusión das novidades editoriais e para a promoción da lectura entre a cidadanía, no espazo dos xardíns de Méndez Núñez.
A nova programación da feira foi presentada en rolda de prensa, nun acto no que o secretario xeral de Cultura, Anxo Lorenzo, cualificou a feira como un evento cultural de referencia en Galicia e unha das primeiras feiras do libro da Península, avalada polos máis de 100.000 visitantes recibidos nas últimas edicións.
Respecto dos factores que contribúen ao éxito desta feira, o secretario xeral destacou o importante traballo que veñen desenvolvendo as librarías da cidade herculina, xunto co labor levado a cabo a través da rede de bibliotecas públicas da Coruña, ademais do papel do resto de libreiros e libreiras que participan no evento, dos editores, dos escritores, dos ilustradores e ilustradoras, e dos lectores e lectoras, xunto coa imprescindible colaboración das entidades implicadas nesta cita de referencia da axenda do verán en Galicia.
Tamén se referiu ás voces referenciais da literatura galega actual que participarán na feira, entre as que se inclúen Luz Pozo Garza, María Solar, Ledicia Costas, Teresa Moure, Miguel Anxo Fernández, María Canosa, Concha Blanco, Claudio Rodríguez Fer e María do Cebreiro, entre outros.
Ademais das presentacións e das sinaturas de libros, o programa da feira ofrecerá durante 10 días numerosos contacontos e obradoiros, xunto con recitais, conferencias e espectáculos musicais baseados en títulos editoriais, e unha exposición sobre A Coruña nos anos vinte de Alvarellos Editora, que será inaugurada o día da apertura da feira, o 1 de agosto, nun acto no que Pinto&Chinto (David Pintor e Carlos López) serán os encargados de ler o pregón.
Promovidas pola Federación de Librarías de Galicia representada na rolda pola súa coordinadora, Nani García e pola Consellería de Cultura e Educación, as Feiras do Libro de Galicia contan na cita da Coruña coa colaboración do Concello e mais da Deputación da Coruña. En representación das administracións local e provincial interviu na presentación José Manuel Sande, concelleiro de Cultura, Deporte e Coñecemento.
Logo de percorrer desde abril os concellos de Pontevedra, Ferrol, Santiago, O Porriño, Redondela, Ribeira, Ourense, Lugo e Vigo, as Feiras do Libro de Galicia chegarán nas próximas semanas á Coruña (do 1 ata o día 10 de agosto), a Viveiro (do día 12 ao 15 de agosto); a Foz (do 18 ao 21 de agosto); e, finalmente, a Monforte de Lemos (do día 24 ao 27 de agosto), onde porán fin ao seu percorrido polas catro provincias galegas.
Fotografía: Gabinete de Comunicación de la Xunta de Galicia
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
