sábado, 3 de mayo de 2025
Nota de prensa del Gabinete de Comunicación de la USC:
Suscitar unha fonda reflexión sobre a importancia da prensa de proximidade e sobre a contribución que esta segue a prestar na actual configuración social e política e Galicia figura tamén entre as premisas que alentaron a organización deste curso estival da USC, un programa dirixido polos profesores María Isabel González Rey e Xosé López García que recupera a memoria de publicacións centenarias como La Voz de Ortigueira e Heraldo de Viveiro, pero que tamén supón unha fiestra para pensar sobre os retos dalgunhas cabeceiras de prensa galegas, tales como El Progreso ou La Voz de Galicia.
O vicerreitor de Coordinación do campus de Lugo, Javier Bueno; a concelleira de Economía do Concello de Lugo, Ana Prieto, e o deputado provincial Álvaro Santos, ademais da decana de Humanidades, María Isabel González Rey, participaron na sesión inaugural deste curso de verán da USC, cuxa sesión de relatorios comezou de seguido cunha intervención do xornalista e director xeral do Grupo El Progreso, José de Cora, quen fará unha exposición baixo o título El Progreso, unha experiencia de 108 anos.
A prensa comarcal, a incidencia da información e da comunicación no desenvolvemento da contorna, o semanario ¡Guau! ¡Guau! e a imprenta Fojo e a prensa ortegana, centrarán a temática dos relatorios programados na sesión matinal da primeira xornada deste curso, nas que interviron como relatores os xornalistas Xosé López García, Luís Celeiro, Juan Soto e o historiador Anxo Rosende. Xa en quenda de tarde, as persoas inscritas neste programa realizaron visitas didácticas ás sedes de El Progreso, de La Comarca del Eo, e da delegación luguesa de La Voz de Galicia.
Estas primeiras intervencións permitiron constatar a importancia histórica da Mariña luguesa e de Ortigueira como enclaves do florecemento da prensa local e comarcal, un patrimonio histórico e cultural que sería interesante conservar, ensinar e darlle promoción, segundo indicou o xefe de Comunicación da USC, Luís Celeiro, quen aproveitou a súa intervención neste foro para lanzar a proposta de creación e posta en marcha dun museo, a xeito de centro de referencia da prensa local, comarcal e das artes gráficas.
Este museo museo didáctico de ámbito galego e carácter público podería estar focalizado en tres puntos, ou con tres sedes, en Ribadeo, Viveiro e Ortigueira. Este novo itinerario cultural e económico a carón do mar permitiría que todos os cidadáns destas comarcas, así como do resto de Galicia e demais visitantes, puideran coñecer como eran as fábricas de cultura na época, como eran os sistemas de impresión, de maquetación, de elaboración de xornais, libros e moitos materiais gráficos de tanto valor aínda na actualidade.
A posta en marcha deste museo, que na opinión de Luís Celeiro, tería unha positiva implicación educativa e axudaría aos mestres de forma transversal na súa tarefa didáctica, debería implicar ás deputacións provinciais de Lugo e da Coruña, ademais da Xunta de Galicia, a través das consellerías de Cultura e Educación e de Economía, e dos concellos.
O programa de relatorios deste curso continuará este venres na Facultade de Humanidades de Lugo, onde o xornalista e colaborador de La Voz de Galicia Ernesto Sánchez Pombo abrirá a quenda de intervencións cunha exposición sobre o futuro da prensa local no mundo global. As experiencias audiovisuais de proximidade, o último medio século de Heraldo de Viveiro, a prensa local de Ribadeo e a prensa infantil e escolar na comarca do Ortegal capitalizarán a temática das intervencións de Ana Isabel Rodríguez, Juan Carlos Neira Brochs, Javier Rivera e Xosé Antonio Neira Cruz ao longo da sesión matinal.
A comitiva do curso desprazarse ata Viveiro, onde logo de visitar a sede de Heraldo de Viveiro, o historiador e cronista local Carlos Nuevo Cal ofrecerá unha charla sobre a importancia da prensa local viveiresa e a súa interacción coa estrutura social e política na bisbarra.
Unha visita a exposición conmemorativa organizada en Ortigueira co gallo do centenario de La Voz de Ortigueira cerrará o venres a programación dun curso que chegará ao seu colofón o sábado 4 de xuño na sede da Fundación Ortegalia de Ortigueira, onde se desenvolverán ao longo de toda a xornada diversos relatorios e táboas redondas sobre a temática da prensa local e comarcal.
A obra Hombre y joven marinero (1929), do poeta e artista Federico García Lorca e pertencente á colección da Fundación Pública Galega Camilo José Cela, formará parte da exposición internacional The First Homosexuals, que se inaugurará o 2 de maio no prestixioso espazo Wrightwood 659 de Chicago. Trátase dunha mostra que reúne máis de 250 obras que documentan as primeiras representacións artísticas da homosexualidade no panorama internacional posterior a 1869. A Fundación Camilo José Cela continúa así co seu labor de conservación, difusión e proxección internacional do seu valioso fondo artístico e documental, favorecendo o diálogo cultural arredor dunha das figuras máis senlleiras da literatura e da arte do século XX.
A figura e o legado de Alfonso Daniel Rodríguez Castelao será divulgada a través dunha decena de publicacións ao longo deste 2025, dentro das accións da programación do Ano Castelo, co que o Goberno galego conmemora o 75 aniversario dunha das figuras máis senlleiras de Galicia. Entre elas estarán 'Celebrando a Castelao. O artista polifacético', de Rubén de Lis, dúas edicións da emblemática obra teatral 'Os vellos non deben de namorarse', os discursos institucionais de Castelao (da man da Fundación Castelao) ou a dixitalización da documentación sobre o Estatuto de 1936 (en colaboración co Instituto Padre Sarmiento).
