martes, 21 de abril de 2026
Nota de prensa del Gabinete de Comunicación del BNG:
O BNG desvelou ante os medios de comunicación que a Comisión Europea abriu en 2012 un procedemento de infracción contra o Estado español por incumprimento da Directiva 2004/49/ de Seguridade Ferroviaria, ao entender que Comisión de Investigación de Accidentes Ferroviarios (CIAF), que investigou o sinistro do Alvia, vulnera o principio de independencia que establece taxativamente o artigo 21 desta directiva.
O procedemento de infracción aberto pola UE un ano antes da traxedia de Angrois súmase ás denuncias feitas polas vítimas e polo Bloque que, desde o inicio, cuestionaron a independencia da CIAF ao considerar que era xuíz e parte e viciaba unha investigación deseñada á medida dos intereses de Adif, Renfe e Fomento.
Precisamente, froito da visita dunha delegación da asociación de vítimas organizada polo Bloque en novembro de 2015 a Bruxelas, a Comisión Europea comprometeuse a elaborar un informe a petición dos e das afectadas e da formación nacionalista. O BNG acaba de reclamarlle ao goberno da UE a difusión dese informe, e vai pedir que o Parlamento galego faga a mesma reclamación.
Ese informe pode mudar o curso da investigación xudicial e o curso das responsabilidades políticas, salientou a portavoz en Bruxelas, Ana Miranda.
Hai un procedemento de infracción aberto contra o Estado español desde 2012 cuestionando a independencia da CIAF, en 2013 hai un tráxico accidente que se investiga con esa CIAF cuestionada por falta de independencia, e hoxe temos un informe da Comisión Europea que se oculta ás vítimas, que o BNG reclama e que pode dar unha volta á investigación do caso Alvia, porque se ese informe confirma que non existiu independencia o procedemento queda cuestionado, resumiu Miranda.
A portavoz nacional, Ana Pontón, xa anunciou que vai levar este asunto ao Parlamento para que a Cámara galega reclame tamén á Comisión ese informe. É necesario unha comisión que depure responsabilidades políticas e, desde logo, facer as modificacións oportunas para que a CIAF sexa independente, subliñou.
Pontón considera que estes novos datos confirman que hai vicios de legalidade no fondo e na forma na investigación e nos informes auto exculpatorios elaborados polo Ministerio de Fomento, con repercusión non só desde o punto de vista político senón tamén no proceso xudicial por falta de imparcialidade.
Pontón deixou claro que o Bloque vai estar coas vítimas ata o final coas que existe unha débeda moral. Merecen xustiza e está só pode erixirse sobre a verdade e a fin da impunidade, polo que imos usar toda a presión política e social para que haxa unha comisión de investigación imparcial. É a mellor homenaxe que lle podemos dar ás vítimas, concluíu.
Miranda explicou que antes de fin de mes o BNG vai recibir resposta da Comisión en relación a difusión do informe e lembrou tamén que está previsto debater en breve na Comisión de Peticións da Eurocámara o accidente de Agrois, en base a dúas denuncias presentadas polos afectados.
En 2025, Lara Weed e Jamie M. Zeitzer, da Universidade de Stanford, publicaron un artigo no que se relacionaba a práctica do cambio estacional de hora con aspectos negativos para a saúse, tanto de sintomatoloxía aguda (infartos ou accidentes cerebrovasculares), como crónica (obesidade). Agora, os profesores José María Martín Olalla, da Universidade de Sevilla, e Jorge Mira Pérez, da Universidade de Santiago de Compostela, tras analizar a metodoloxía aplicada neste estudo, constataron que 'o que o mundo leu como unha evidencia científica contra o cambio de hora resultou ser unha ilusión matemática'.
Un total de 15.733 persoas concorrerán ás oposicións de Educación deste ano 2026 segundo a listaxe provisional de admitidos publicado no Portal Educativo. Cómpre lembrar que, froito do acordo entre a Consellería de Educación, Ciencia, Universidades e FP e os sindicatos CC.OO., ANPE, UGT-SP Ensino e CSIF, como novidade nesta ocasión os interinos non teñen a obriga de presentarse ao exame, co obxectivo de axilizar o proceso. Isto provoca un descenso de case o 23% nas probas respecto á convocatoria do ano pasado. En concreto, 4.689 aspirantes menos. A Xunta de Galicia convoca para este proceso un total de 1.601 prazas, o que supón esgotar o 120% da taxa de reposición marcado polo Estado.
