jueves, 9 de abril de 2026
Nota de prensa remitida polo Gabinete de Comunicación da Xunta de Galicia:
O conselleiro de Cultura, Educación e Ordenación Universitaria, Román Rodríguez, volveu a tender hoxe no Parlamento galego a man aos grupos da oposición co obxectivo de buscar un consenso o máis amplo posible en torno ao galego, que é a lingua de todos e todas, sinalou.
Tal e como indicou hai quince días na súa primeira comparecencia parlamentaria, o responsable do departamento educativo da Xunta de Galicia insistiu na necesidade de deixar o idioma propio da Comunidade á marxe da confrontación política e da discrepancia, trasladando ao ámbito político a normalidade e a convivencia entre linguas que hai nunha sociedade galega máis galeguista que nacionalista, puntualizou.
Neste senso, Román Rodríguez pediu escoitar máis aos galegos, que queren acordos e rexeitan imposicións e non comparten a postura dos nacionalistas dunha Galicia só en galego, senón o de unha Galicia plural onde convivan as linguas. É neste punto onde a Consellería pretende procurar o acordo e así llo recordou hoxe de novo aos grupos parlamentarios. Traballemos sobre o que nos une e non sobre o que nos separa, instou.
En todo caso, rememorou intentos pasados para chegar a acordos en materia lingüística que derivaron en fracaso, como a proposición non de lei aprobada en maio de 2013 só cos votos do Grupo Popular. Nese momento, a Xunta abriu un proceso de diálogo cos diferentes voceiros de lingua dos grupos parlamentarios, pero non foi posible avanzar, destacou Román Rodríguez, quen agora realiza un novo ofrecemento de entendemento.
No referente á última enquisa do IGE, o responsable do departamento educativo do Goberno galego asegurou compartir a necesidade de mellorar, dado que algo está a fallar no uso da lingua propia. Pero tamén reivindicou os datos positivos que reflicte este estudo, como que o galego continúa a ser a lingua maioritaria de Galicia e o alto grao de coñecemento oral e escrito entre a poboación, o máis alto da historia, remarcou. Tamén destacou a freada da caída de galegofalantes nos últimos anos, pois mentres entre 2003 e 2008 descenderon 12 puntos, entre 2008 e 2013, esa baixada só foi de dous puntos.
Plan de dinamización lingüística no ámbito económico
Aínda así, a Consellería segue traballando a prol da lingua, e por iso está desenvolvendo un plan de dinamización lingüística no tecido económico, cun horizonte ata 2020. Unha iniciativa que pretende incrementar o uso do galego no eido empresarial, convencendo e non impoñendo, resaltou o conselleiro de que a súa utilización representa un valor engadido nas relacións comerciais, sobre todo no ámbito da lusofonía.
O plan, cuxa elaboración contará coa participación de todos os sectores implicados, incluirá accións concretas dirixidas a autónomos, cooperativas, banca e grandes empresas co fin de que a potenciación do uso da lingua neste ámbito redunde tamén nun maior emprego no resto da sociedade.
Nota de prensa do Gabinete de Comunicación do PSdeG:
O portavoz de Cultura do Grupo Socialista, Francisco Caamaño, acusou ao presidente da Xunta de desenvolver unha política de DDT contra o galego, baseada no Descrédito, Desleixo e Trampantoxo. No debate dunha interpelación no Pleno do Parlamento, responsabilizou á Xunta de que o galego deixara por primeira vez de ser a lingua habitual dos galegos, pasando do 57 ao 44 por cento segundo o IGE.
O responsable socialista acusou ao goberno galego de levar anos traballando para acadar este resultado, mentres o presidente da Xunta responsabiliza ás familias destes datos derivados da xestión do seu goberno.
Caamaño sinalou unha estratexia deliberada de desprestixio do galego dende a Xunta, dando a entender que era unha lingua secundaria que non se tiña nin por qué estudar moito na escola. De aí a súa ruptura deliberada co consenso en torno ao Plan de Normalización Lingüística e a toma de medidas dirixidas a desprestixiar a lingua.
Lembrou que foi Feijóo o que retirou o requisito do coñecemento do galego para ocupar un posto na administración pública de Galicia, recoñecendo o dereito de algunhas persoas a ignorar a lingua propia oficial de Galicia. Explicou que con esta medida coartan a liberdade dos galegos de dirixirse na súa lingua á administración, mentres resulta practicamente imposible dirixirse ao poder xudicial do Estado en Galicia falando en galego.
Na mesma liña situou o Decreto do Plurilingüismo na escola, un intento de encubrir a estratexia de desprestixio e de subliñar que o importante é o inglés, mentres o galego non é oficial como o castelán. Lembrou que mentres o País Vasco negociou e acadou que o goberno central quedara á marxe da planificación do ensino da lingua, a Xunta aplica a Lomce sen preguntarse sobre o seu impacto na lingua propia.
Estas medidas viñeron acompañadas, engadiu, do desleixo demostrado polo goberno galego a través dos recortes orzamentarios drásticos nas políticas de apoio á defensa lingua galega. Estas pasaron dos 21,5 millóns de euros en 2009 a os tan só 6,7 millóns de euros orzamentados por Feijóo para o ano 2015, cun descenso do 70 por cento, mentres desenvolven o argumento de que hai outras necesidades.
Mesmo lembrou que o último orzamento aprobado polo anterior presidente do PP, Manuel Fraga, chegara aos 19,5 millóns de euros, moi por riba do esforzo destinado por Feijóo. Advertiu que sen recursos non hai políticas públicas en defensa da lingua, por non falar da cultura, que pasou dos 141,06 millóns de euros en 2004 aos 57,7 por cento en 2015.
O último eixo das políticas de ataque contra a lingua encetadas por Feijóo é o trampantoxo, centrando a súa acción no bilingüismo de aparencia, polo que escapan das responsabilidades e cren que o expediente da defensa da lingua e da cultura arránxase xuntando un día ao ano catro persoeiros e facendo un concurso floral.
Caamaño acusou ao PP e ao goberno galego de non ter mais que ouvidos xordos á realidade e non entender as consecuencias das políticas que levan feito, logo de que onte acusaran ao PSdeG de copiar as iniciativas en defensa da lingua e da cultura, cando toda Galicia estalles a dicir que o goberno galego ten un problema.
Esixiulle ao goberno galego que expliquen aos galegos e galegas a realidade e asuman as súas responsabilidades na defensa da lingua de acordo coa Constitución e o Estatuto e instounos a non deixar que morra día a día nun xogo de aparencias.
O Carballo Interplay desenvolverá do 16 ao 19 de abril no Mercado de Carballo a súa 13ª edición cun programa de 32 actividades arredor da creación dixital contemporánea, das series en pequeno formato, a cultura de internet e a reflexión sobre os novos modos de comunicar na rede. O certame reforza especialmente este ano a presenza do galego como lingua de creación, conversa e pensamento no ecosistema dixital, cunha programación específica arredor dos contidos no noso idioma nas redes sociais, accións formativas para a mocidade, premios dirixidos a recoñecer o talento que crea na nosa lingua e novas oportunidades para a produción de proxectos audiovisuais nados no ámbito dixital.
A Cidade da Cultura celebrará o Día do Circo o vindeiro 19 de abril co espectáculo 'Sen patrón', da compañía galega Pistacatro, recoñecida co Premio Nacional 2025 desta disciplina artística. A proposta terá lugar no Xardín do Teatro, ás 17,00 horas, con entrada libre e de balde. Así, o Día do Circo convértese nun momento para celebrar tamén a chegada da primavera cunha proposta escénica aberta, festiva e accesible para todo tipo de públicos, que combina cabaré, números aéreos e malabares cunha dramaturxia que reivindica tanto técnicas circenses tradicionais como contemporáneas. Pistacatro é unha das compañías e produtoras de circo máis relevantes das artes vivas de Galicia, que traballa a prol da profesionalización do circo na Comunidade, impulsando as carreiras de artistas e traballadores do sector.
