Notas de prensa

Nace UDC Conecta, iniciativa da Universidade da Coruña para impulsar a colaboración co tecido produtivo

“Coa premisa de que a innovación é unha misión compartida entre empresa e universidade, desde a UDC queremos transformar o coñecemento en valor, nun valor útil para o noso tecido produtivo e, por ende, para a sociedade.” Así o destacou hoxe o reitor da UDC, Ricardo Cao, durante a presentación deste programa, que estará coordinado pola Oficina de Transferencia do Coñecemento (OTC) da UDC.

O acto de presentación, realizado no Paraninfo con representantes de máis de 100 empresas, foi conducido pola divulgadora Tamara Pazos e inaugurado polo reitor da Universidade da Coruña. A clausura correu a cargo do presidente do presidente do Consello Social da UDC, Antonio Abril; e o vicerreitor de Investigación e Transferencia, Jerónimo Puertas.

Actualmente, explicou Cao, contamos cun equipo de máis de 1.400 persoas investigadoras, parte delas adscritas a algún dos catro centros de investigación: o Centro de Interdisciplinar de Química e Bioloxía (CICA), o Centro de Investigación en TIC (CITIC), o Centro de Innovación Tecnolóxica en Edificación e Enxeñería Civil (CITEEC) e o Centro de Investigación en Tecnoloxías Navais e Industriais (CITENI); ou vinculados ao Campus Industrial de Ferrol. Todos eles, centros nos que se está a traballar con altos niveis de excelencia.

A investigación de calidade e a transferencia dese coñecemento ao servizo da sociedade é un dos obxectivos primordiais do equipo de Goberno da UDC.

É neste marco “no que quixemos dar un paso máis e achegarnos, de xeito máis directo e sinxelo, ao noso tecido empresarial e produtivo. A colaboración entre ambas partes é necesaria e enriquecedora”, afirmou o reitor.

Desde o ámbito académico, achéganse solucións baseadas en evidencias, en tecnoloxía e en innovación. Desde a empresa, existe a oportunidade de aproveitar este talento para innovar, mellorar procesos e xerar valor económico e social.

Pola súa banda, Susana Ladra, adxunta de Transferencia, foi a encargada de detallar os diferentes recursos que a UDC pode poñer ao servizo do tecido produtivo. Destacou os 139 grupos de investigación dos que dispón a Universidade na actualidade, xunto cos 4 centros de investigación: o CITIC e o CICA acreditados pola Xunta de Galicia como centros de excelencia, o CITEEC como centro de investigación cooperativa e o CITENI. “A estas unidades engádese a participación nos tres centros de investigación universitarios (ECOBAS, CISPAC e CITMAGA), así como o Servizo de Apoio á investigación, dotado con equipos tecnolóxicos punteiros que prestan servizos tecnolóxicos avanzados”, engadiu.

Ladra explicou que outro dos obxectivos de UDC Conecta é facilitar todo o potencial dos equipos de investigación da Universidade a través dunha plataforma única, de xeito que a empresa poida contactar dunha forma áxil e sinxela cos diferentes grupos que a poidan axudar.

A adxunta de Transferencia subliñou que esta iniciativa responde á terceira misión da universidade. “A docencia forma, a investigación transforma e a transferencia conecta”, afirmou. É a ponte que converte o coñecemento en motor de desenvolvemento para a sociedade.

Con UDC Conecta, a área de Transferencia da Universidade quere impulsar unha alianza empresa universidade que durante o ano pasado desenvolveu un total de 280 proxectos en colaboración con empresas ou institucións, o que supuxo a captación de 5,7 millóns de euros.

Así, tal e como explicou Ladra, a través desta unión, empresa e universidade contan con diferentes instrumentos (cátedras, unidades mixtas de investigación, contratación de servizos científicos, tecnolóxicos e artísticos a través do chamado artigo 60 da LOSU; doutoramento industrial, licenzas de explotación, formación a medida e proxectos colaborativos) para canalizar esta colaboración e compartir sinerxías que permitan dar resposta aos principais retos e desafíos que presenta.

Incremento da captación en investigación e talento

Durante o ano 2024 lográronse avances moi significativos no ámbito da investigación e a transferencia. A rede de centros CIGUS, da que só formaba parte o CITIC no que respecta á UDC, incorporou ao CICA ao CITEEC, este último como centro colaborativo. Desde a rede de centros e unidades de investigación (REDCIDi) da UDC, estase a traballar para homexeneizar as boas prácticas en xestión e captación de talento, que levaron ao éxito do CITIC e do CICA, na totalidade dos centros de investigación. O obxectivo é que na próxima convocatoria todos os centros da UDC poidan adquirir a acreditación.

Polo que respecta á captación de fondos e proxectos de investigación, o pasado ano acadáronse 34 M€, un exercicio no que diferentes equipos da UDC traballaron en 75 proxectos competitivos, 18 deles de alcance europeo.

Mesa redonda

A xornada UDC Conecta tamén contou cunha mesa redonda na que participaron Alba Tuñas Cantorna, co-directora da Cátedra Resonac-UDC Sparking Truth; Francisco Javier Prego Martínez, responsable do departamento de I+D+i de Extracto; Rafael Morgade, director de Transformación Dixital e Industrial en Navantia Ría de Ferrol, Centro Mixto de Investigación UDC-Navantia (CEMI) -CITENI; e María José Mariño Fontenla, directora da área de Talento e Transferencia da Axencia Galega de Innovación da Xunta de Galicia.

Francisco Javier Prego comentou que “cando se decidiu crear un departamento de I+i na empresa non tiñamos idea de como facer e ocorréuseme preguntar na Universidade da Coruña ao que hoxe é o vicerreitor de Investigación. El faloume do CEDETI“, “vimos que a UDC era a vía perfecta para entrar na innovación”, “a partir do 2008 empezamos a colaborar de forma regular coa Universidade da Coruña.“ Sen a UDC unha empresa como a miña non tería entrado nun mundo totalmente alleo e descoñecido” “creo que a UDC é un factor clave para o desenvolvemento das empresas de Galicia”.

Rafael Morgade, pola súa banda, destacou que “hai 10 anos uns pioneiros por parte da Universidade e Navantia decidiron facer unha nova ponte das Pías e conseguimos buscar unha fórmula para -de forma organizada- volver conectar Ferrolterra”.

María Jose Mariño indicou que: “o noso tecido empresarial se compón de Pemes e micropemes, o único recurso que teñen para iniciarse na I+D+i é a cooperación e a Universidade é un dos principais axentes nese ecosistema” “se hai algo no que Galicia destaca é na colaboración público-privada”. A directora da área de Talento e Transferencia da Axencia Galega de Innovación destacou que “unha forma destacada de levar a innovación á empresa son os doutoramentos industriais”. “Cando facemos promoción das capacidades de innovación de Galicia somos a envexa sa de outras comunidades”

Finalmente, Alba Tuñas, incidiu en que “non podemos ter expertos en todo na empresa”. É unha dedicación de recursos que non sería sostible”, matizou. “Ter unha universidade con posibilidade de colaboración marca a diferenza á hora de convencer a unha empresa internacional para poñer unha sede na Coruña”.