Notas de prensa

Declaración institucional da Xunta no Día Internacional contra a Violencia de Xénero

O martes, 25 de novembro de 2014, conmemórase o Día Internacional para a Eliminación da Violencia de xénero.

Todos os poderes públicos temos a obriga de adoptar as medidas necesarias para facer reais e efectivos estes dereitos.

A violencia de xénero maniféstase de moi diversas formas, en todas as culturas e países, en todas as clases sociais e en todas as idades. Así o reflicten as estatísticas, que mostran unha pequena parte, pero grave, da magnitude total da violencia exercida contra as mulleres, polo mero feito de selo.

O Goberno galego, con motivo do Día Internacional para a eliminación da violencia de xénero, quere facer especial fincapé , por un lado na poboación máis nova, que parece estar reproducindo de maneira preocupante un sexismo e uns estereotipos de xénero que criamos erradicados, e por outro lado, nas mulleres de máis de 65 anos que están a sufrir violencia de xénero, e nas que as situacións de convivencia prolongadas co agresor levan a cronificar e normalizar esas situacións.

Dende a Xunta de Galicia estamos convencidos e convencidas de que a familia e a escola son os dous ámbitos de socialización que máis inflúen na aprendizaxe das persoas, e polo tanto é nestes ámbitos onde se debe traballar a prevención de actitudes sexistas e discriminatorias, así como fomentar a reflexión sobre os roles e os valores que rexen na sociedade.

O compromiso da Administración é articular unha resposta global fronte á violencia de xénero, en calquera das súas modalidades e consecuencias, a través dunha asistencia integral ás mulleres vítimas, aos seus fillos e fillas e a outras persoas que estean ao seu cargo, así como fortalecer a prevención para avanzar na paulatina redución desta miserable lacra social ata a súa completa erradicación.

As medidas serán insuficientes mentres unha muller viva baixo o medo e a falta de liberdade que iso supón e, calquera balance será negativo mentres haxa unha soa muller asasinada por esta causa, xa que iso significa que non viviremos nin gozaremos dunha sociedade verdadeiramente democrática, que poida vivir libre e en igualdade.

Rematar coa violencia de xénero é para o Goberno galego unha prioridade e un deber de xustiza coas vítimas e con toda a sociedade.

A Xunta incide na importancia que ten a educación para erradicar calquera forma de violencia

A secretaria xeral de Igualdade, Susana López Abella destacou a importancia que ten a educación para erraradicar calquera forma de violencia, e incidiu que o respecto, a liberdade e a igualdade son tres dos piares básicos que deben estar sempre presente na formación dunha persoa.

Susana López Abella asisitu no Parador de Baiona á inauguración da “Xornadas de información sobre agresións sexuais” enmarcada no Programa Irene, de Información, Formación e Prevención da Violencia sexual en xóvenes e adolescentes, a través dun convenio de colaboración entre o Instituto da Muller e o Concello de Baiona.

A titular de Igualdade fixo especial fincapé en que calquera acción que intente forzar ou manipular decisións persoal é un ataque directo á liberdade e a integridade dunha persoa.

López Abella lembrou que hoxe conmemorase o Día internacional para a eliminación da violencia contra as mulleres e indicou qu non convén esquecer que esta violencia ten moitas formas, e unha desas, a que atenta particularmente contra a liberdade e a dignidade das mulleres, é a das agresións sexuais, tal e como aparece recollido na Lei galega para a prevención e o tratamento integral da violencia de xénero do ano 2007.

E, ao igual que a violencia de xénero que se expresa mediante o maltrato, esta violencia hai que combatila con medidas de seguridade pero tamén, e ante todo, con medidas preventivas e con medidas educativas.

Segundo palabras da Secretaria Xeral, todas estas formas de violencia de xénero aliméntanse dos mesmos problemas de valores, dos mesmos estereotipos caducos e dos mesmos mitos enganosos e que desgraciadamente a poboación máis nova parece estar reproducindo de maneira preocupante ese sexismo e eses estereotipos de xénero que criamos erradicados, polo que recalcou que é fundamental rachar cos estereotipos.